13 July, 2026 08:17 AM IST | Mumbai | Gujarati Mid-day Correspondent
નેરુલ રેલવે-સ્ટેશનના પરિસરમાં પોલીસને ચાકુ દેખાડતો માથાફરેલ.
નેરુળ-વેસ્ટમાં સ્ટેશનના પરિસરમાં પોલીસવાળાને જ એક માથાફરેલ માણસે ચાકુ દેખાડીને ધમકાવ્યો હોવાની ઘટના બની હતી. અહીં મોટી સંખ્યામાં લોકોની અવરજવર હતી ત્યારે જ આ બનાવ બન્યો હતો. આ આખી ઘટનાનો વિડિયો પણ સોશ્યલ મીડિયા પર વાઇરલ થયો હતો.
આ ઘટનાને કારણે કાયદો-વ્યવસ્થાની સ્થિતિ પર પણ સવાલ ઊભો થયો છે. ઇન્ટરનેટ પર વિડિયો વાઇરલ થયા બાદ લોકોએ સવાલ ઉઠાવ્યો હતો કે લોકોની રક્ષાની જવાબદારી જેના પર છે તેને જ આ રીતે ભરરસ્તે ચાકુ દેખાડીને ધમકાવવામાં આવે છે ત્યારે સામાન્ય લોકોનું શું થશે?
સ્થાનિક લોકોએ પણ આ ઘટના બાદ પરિસરમાં દારૂડિયાઓને કારણે ઊભી થતી સમસ્યા સામે ધ્યાન દોર્યું હતું. તેમનું કહેવું છે કે સ્ટેશનના પરિસરમાં વાઇન શૉપની બહાર જ લોકો દારૂ પીતા હોય છે અને નશો કરીને ધમાલ મચાવતા હોય છે તથા અહીંથી પસાર થતા લોકોને પણ હેરાન કરતા હોય છે. ખાસ કરીને મહિલા, વિદ્યાર્થિનીઓ અને વરિષ્ઠ નાગરિકોને આ લોકોથી ખૂબ જ ખતરો છે એવું સ્થાનિકોનું કહેવું છે. અહીં પોલીસ પૅટ્રોલિંગ વધારવું જોઈએ અને કાયમી સ્વરૂપે પીલીસને તહેનાત કરવા જોઈએ એવી માગણી લોકોએ કરી છે.
