13 February, 2020 11:38 AM IST | Mumbai Desk
નાગપાડા પોલીસ સ્ટેશનમાં કાર્યરત એક કૉન્સ્ટેબલને માનસિક અસ્થિર માણસે આંગળી ઉપર બટકું ભર્યું હતું જેથી કૉન્સ્ટેબલની આંગળીનો કેટલોક ભાગ કપાઈ ગયો હતો. કૉન્સ્ટેબલને સારવાર માટે જે. જે. હૉસ્પિટલમાં લઈ જવાયા હતા.
ઘટના અનુસાર બુધવારે સવારે પોલીસ કૉન્સ્ટેબલ સંતોષ શિખરે નાગપાડા જંકશન પર એક માણસ અસ્થિર હાલતમાં સૂતો હતો અે જોતા શિખરે તેને ત્યાંથી ખસેડવા માટેનો પ્રયાસ કર્યો હતો. સૂતેલા માનસિક રીતે અસ્થિર માણસે શિખરેની આંગળી ઉપર બટકું ભર્યું હતું. અસ્થિર માણસે ભરેલું બટકું એટલું જોરદાર હતું કે શિખરેની આંગળીનો આગળનો ટુકડો નીકળી ગયો હતો. હાજર રહેલા બીજા પોલીસ કૉન્સ્ટેબલોએ શિખરેને જે. જે. હોસ્પિટલમાં દાખલ કર્યો હતો. અસ્થિર માણસ આ પરાક્રમ કરી ત્યાંથી ભાગી ગયો હતો. જોકે નાગપાડા પોલીસે તેને શોધી ધરપકડ કરી છે.