ચર્ની રોડ પર ટ્રેનના ૧૧ ડબ્બા સ્ટેશનની બહાર નીકળી ગયા

ઓવરશૂટિંગની ઘટના મોટરમૅન જ્યારે સમયસર બ્રેક અપ્લાય ન કરે ત્યારે બનતી હોય છે.

પ્રતીકાત્મક તસવીર

વેસ્ટર્ન રેલવેમાં ગઈ કાલે બપોરે ચર્ચગેટ જઈ રહેલી ફાસ્ટ ટ્રેન ચર્ની રોડ સ્ટેશન પર રોકાવાને બદલે ૧૧ ડબ્બા આગળ નીકળી ગઈ હતી. માત્ર છેલ્લા ડબ્બાના પૅસેન્જર્સને જ પ્લૅટફૉર્મ પર ઊતરવા મળ્યું હતું. જોકે એ પછી ટ્રેન પાંચ મિનિટ સુધી ઊભી રહી હતી. આ ટ્રેનનો મોટરમૅન એસ. કે. સહા હતો. વેસ્ટર્ન રેલવેએ હવે આ સંદર્ભે ઇન્ટર્નલ ઇન્ક્વાયરી ચાલુ કરી છે.  

વેસ્ટર્ન રેલવેના ઑફિસરે આ વિશે કહ્યું હતું કે ‘ઓવરશૂટિંગ ટ્રેન આગળ નીકળી જવાની આ ઘટના બપોરે ૨.૪૮ વાગ્યે બની હતી. ૧૧ કોચ આગળ નીકળી ગયા હતા. ઓવરશૂટિંગ ગંભીર ગણાતું હોય છે. જોકે એમ છતાં એ રેડ સિગ્નલ હોવા છતાં એને જમ્પ કરી આગળ નીકળી જવા કરતાં વધુ જોખમી નથી ગણાતું. લાલ સિગ્નલ હોવા છતાં ટ્રેન ન રોકનાર મોટરમૅને સુરક્ષાનો ભંગ કર્યો હોવાનું કહેવાય છે. જોકે બન્ને ઘટનામાં મોટરમૅનની જ ભૂલ હોવાનું ગણતરીમાં લેવાય છે.’

ઓવરશૂટિંગની ઘટના મોટરમૅન જ્યારે સમયસર બ્રેક અપ્લાય ન કરે ત્યારે બનતી હોય છે. આના કારણે જે પૅસેન્જર્સને એ સ્ટેશન પર ઊતરવું હોય તેમણે ટ્રૅક પર ઊતરીને પાછા જવું પડે છે, જ્યારે બીજી તરફ પ્લૅટફૉર્મ પર એ ટ્રેનમાં ચડી આગળ જવા માગતા પૅસેન્જર્સને એ ટ્રેનમાં ન ચડવા મળતાં બીજી ટ્રેન માટે રાહ જોવી પડે છે.