ઈરાનને માત આપવા ડોનલ્ડ ટ્રમ્પે ભારતથી યુરોપ સુધીના મેગા કૉરિડોરને આપ્યું સમર્થન

અમેરિકાના પ્રમુખે ઇન્ડિયા-મિડલ ઈસ્ટ-યુરોપ ઇકૉનૉમિક કૉરિડોર પ્રોજેક્ટને સુરક્ષિત વેપાર માટે મહત્ત્વનો ગણાવ્યો

ડોનલ્ડ ટ્રમ્પ

અમેરિકાના પ્રમુખ ડોનલ્ડ ટ્રમ્પે મંગળવારે સંયુક્ત રાષ્ટ્ર મહાસભાની બેઠક દરમ્યાન ઇન્ડિયા-મિડલ ઈસ્ટ-યુરોપ ઇકૉનૉમિક કૉરિડોર (IMEC)ને ખુલ્લું સમર્થન આપ્યું છે. ટ્રમ્પે સ્પષ્ટ જણાવ્યું હતું કે ઈરાનના સતત આતંકવાદી હુમલાઓને કારણે પશ્ચિમ એશિયાના ઊર્જા-રૂટને ઈરાનના ચેકપૉઇન્ટથી દૂર કરવાની સખત જરૂર છે. આથી અમેરિકા આ મેગા પ્રોજેક્ટ અને અન્ય ઑઇલ પાઇપલાઇન વિકલ્પોનું દૃઢપણે સમર્થન કરી રહ્યું છે. 
૨૦૨૩માં નવી દિલ્હીમાં વડા પ્રધાન નરેન્દ્ર મોદીની અધ્યક્ષતામાં યોજાયેલી G20 સમિટમાં આ પ્રોજેક્ટની જાહેરાત કરવામાં આવી હતી. આ કૉરિડોર ભારતને ગલ્ફ દેશો સાથે દરિયાઈ માર્ગે અને ત્યાંથી યુરોપ સાથે રેલવે અને રોડ નેટવર્કથી જોડશે. એનાથી ભારતનો વેપાર વધશે અને સપ્લાય વધુ સુરક્ષિત બનશે. ભારતના વિદેશપ્રધાન એસ. જયશંકરે પણ આ મામલે તાજેતરમાં યુરોપિયન યુનિયન સાથે બેઠક કરી હતી.
ટૂંકમાં કહીએ તો IMEC માત્ર એક ટ્રેડ-રૂટ નથી પણ ચીનના બેલ્ટ અૅન્ડ રોડ ઇનિશિએટિવ (BRI) સામેનો મોટો પડકાર છે. જોકે હાલમાં ગાઝા અને ઈરાન યુદ્ધને કારણે આ પ્રોજેક્ટનું કામ ધીમું પડ્યું છે પરંતુ ટ્રમ્પના સીધા સમર્થનથી સ્પષ્ટ થાય છે કે અમેરિકા અબજો રૂપિયાના આ પ્રોજેક્ટને ભવિષ્યના સુરક્ષિત ઑઇલ સપ્લાય અને ટ્રેડ નેટવર્ક માટે કોઈ પણ ભોગે સાકાર કરવા સંપૂર્ણપણે તૈયાર છે.