26 December, 2018 01:18 PM IST |
મુખ્યપ્રધાન વિજય રૂપાણી
મુખ્ય પ્રધાન વિજય રૂપાણીએ ગઈ કાલે ગાંધીનગર પાસે કોલવડામાં શરૂ થયેલા સંસ્કૃત ભારતી ગુજરાતના પ્રાંતીય અધિવેશનનો પ્રારંભ કરાવતાં ભારપૂર્વક કહ્યું હતું કે સંસ્કૃત બચશે તો જ સંસ્કૃતિ ટકી શકશે એ વાત ધ્યાનમાં રાખીને આપણે સૌએ રાષ્ટ્રની ધરોહર–માનબિંદુ સમાન સંસ્કૃત ભાષાના જતન–વ્યાપ અને સંવર્ધન માટે પ્રતિબદ્ધ બનવું જ પડશે.
વિજય રૂપાણીએ સંસ્કૃતને બધી ભાષાની મૂળ ભાષા ગણાવતાં સ્પષ્ટપણે કહ્યું હતું કે ભારતની બ્રૅન્ડ-ઇમેજની ક્ષમતા ધરાવતી આ ભાષાને સ્યુડો-સેક્યુલરિસ્ટ અને ઢોંગી બિનસાંપ્રદાયિકોએ જુદી રીતે ચીતરીને આપણા દેશની ધરોહર, માનબિંદુ પર કુઠરાઘાત કરવાના પ્રયાસો કર્યા છે.
આ પ્રસંગે સંસ્કૃત ભાષા–સાહિત્યમાં વિવિધ ક્ષેત્રે ઉત્કૃષ્ટ પ્રદાન કરનારી વ્યક્તિઓને અવૉર્ડ અને પ્રમાણપત્ર આપીને સન્માનિત કર્યા હતા. બે દિવસ માટે યોજાઈ રહેલા આ અધિવેશનમાં સંસ્કૃત ભાષાના વ્યાપક પ્રચાર–પ્રસારનું સમૂહમંથન કરવામાં આવશે.