ભુટ્ટાની સીઝન છે ત્યારે કેવી મકાઈ સારી? બાફેલી કે શેકેલી?

ચોમાસામાં ગરમાગરમ મકાઈ ખાવાની મજા સાથે તેના સ્વાસ્થ્યલાભ પણ જાણો. બાફેલી અને શેકેલી મકાઈમાંથી કઈ વધુ હેલ્ધી છે, કયા લોકો માટે ફાયદાકારક છે અને બટર-ચીઝ કેમ ટાળવું તે જાણો.

ભુટ્ટાની સીઝન છે ત્યારે કેવી મકાઈ સારી? બાફેલી કે શેકેલી?

ચોમાસાની ઋતુ શરૂ થતાં જ વરસાદનાં ઝાપટાં વચ્ચે ગરમાગરમ મકાઈ ખાવાની મજા કંઈક અનોખી જ હોય છે. કોલસાની સગડી પર શેકાતી મકાઈની સોડમ અને એના પર લગાવેલા 
લીંબુ-મરી-મીઠાનો સ્વાદ સૌને આકર્ષિત કરે છે. બીજી તરફ ઘરમાં બાફેલી મકાઈમાં થોડો મસાલો ઉમેરીને ખાવી એ પણ સાંજના નાસ્તા માટે શ્રેષ્ઠ અને પૌષ્ટિક વિકલ્પ છે.

મકાઈ પોષક તત્ત્વોનો ખજાનો

ઊર્જાનો સ્રોત : મકાઈમાં કૉમ્પ્લેક્સ કાર્બોહાઇડ્રેટ્સ હોય છે જે શરીરને લાંબા સમય સુધી સતત ઊર્જા પૂરી પાડે છે.
પાચન અને ફાઇબર : એમાં રહેલું ડાયટરી ફાઇબર પાચનતંત્રની કામગીરી સુધારે છે, કબજિયાત અટકાવે છે અને પેટને લાંબો સમય ભરેલું રાખે છે.
વિટામિન્સ અને મિનરલ્સ : મકાઈમાં વિટામિન B કૉમ્પ્લેક્સ, મૅગ્નેશિયમ, પોટૅશિયમ, ફૉસ્ફરસ અને ઍન્ટિ-ઑક્સિડન્ટ્સ ભરપૂર માત્રામાં હોય છે.
ગ્લુટેન-ફ્રી : મકાઈ કુદરતી રીતે ગ્લુટેન-ફ્રી હોવાથી ગ્લુટેન ઍલર્જી ધરાવતા લોકો માટે પણ સુરક્ષિત વિકલ્પ છે.

તમારે કઈ પસંદ કરવી?

હકીકતમાં બાફેલી કે શેકેલી બન્ને મકાઈ પોતપોતાની રીતે હેલ્ધી છે. મુખ્ય ફરક મકાઈ પર ઉમેરવામાં આવતી વધારાની સામગ્રીથી પડે છે. મકાઈ પર વધુ મીઠું લગાવીને ખાવાથી શરીરમાં સોડિયમનું પ્રમાણ વધે છે જે બ્લડ-પ્રેશર ધરાવતા દરદીઓ માટે નુકસાનકારક છે. ગરમાગરમ મકાઈ પર પ્રોસેસ્ડ બટર કે ચીઝનો થર લગાવવાથી મકાઈની મૂળ પોષક ગુણવત્તા ઘટી જાય છે અને એમાં ફૅટી કૅલરીનું પ્રમાણ વધી જાય છે. જો તમારે હળવો અને આસાનીથી પચી જાય એવો નાસ્તો જોઈતો હોય તો બાફેલી મકાઈ શ્રેષ્ઠ છે, પરંતુ જો તમે વજન ઉતારવાની જર્ની પર છો અને સ્વાદિષ્ટ નાસ્તો ઇચ્છો છો તો સાદી શેકેલી મકાઈ ઉત્તમ છે. ચોમાસામાં ગરમાગરમ ભુટ્ટાની મજા જરૂર લો, પણ એના પર બટર કે ચીઝ લગાવવાને બદલે માત્ર થોડું લીંબુ અને ચપટી મસાલો ભભરાવીને ખાવો એ જ સ્વાસ્થ્ય માટે સૌથી વધુ ગુણકારી રહેશે.

બાફેલી મકાઈના ફાયદા અને સાવધાની

બાફેલી મકાઈ પેટ માટે ખૂબ જ હળવી અને સુપાચ્ય માનવામાં આવે છે.
સરળ પાચન : બાફવાથી મકાઈના દાણા નરમ થઈ જાય છે એટલે પાચનતંત્ર પર વધારાનો બોજ પડતો નથી.
બાળકો અને વૃદ્ધો માટે ઉત્તમ : જે લોકોના દાંત નબળા હોય કે ચાવવામાં તકલીફ હોય તેમના માટે બાફેલી મકાઈ ખાવામાં ખૂબ આસાન રહે છે.
પોષક તત્ત્વોની જાળવણી : મકાઈને યોગ્ય રીતે બાફવામાં આવે તો એનાં પોષક તત્ત્વો નષ્ટ થતાં નથી અને એ શરીરને તરત એનર્જી આપે છે.

શેકેલી મકાઈના ફાયદા અને સાવધાની

કોલસા કે સીધી આંચ પર શેકેલી મકાઈનો સ્વાદ સાવ અલગ જ હોય છે.
કુદરતી કૅરમલાઇઝેશન : શેકવાથી મકાઈમાં રહેલી કુદરતી શુગર કૅરમલાઇઝ થાય છે એટલે એનો સ્વાદ અને સુગંધ ડબલ થઈ જાય છે.
ઓછી કૅલરી : શેકવા માટે તેલ કે પાણીની જરૂર પડતી નથી એટલે એમાં વધારાની કૅલરી ઉમેરાતી નથી.
વજન નિયંત્રણ : વજન ઘટાડવા કે કન્ટ્રોલ કરવા માગતા લોકો માટે સાદી શેકેલી મકાઈ મદદરૂપ થાય છે.
ડાયાબિટીઝના દરદીઓ માટે : શેકવાને કારણે એનો ગ્લાયસેમિક રિસ્પૉન્સ બદલાઈ શકે છે એટલે ડાયાબિટીઝના દરદીઓએ શેકેલી મકાઈ મર્યાદિત પ્રમાણમાં જ ખાવી જોઈએ.