મોટા સ્ટાર્સને કારણે ફિલ્મ સાઇન કરી હોવા છતાં રિપ્લેસ કરવામાં આવી હતી શેફાલી શાહને

શેફાલી શાહે જણાવ્યું હતું કે એક ફિલ્મ તેણે સાઇન કરી અને અચાનક બીજા દિવસે જાણ થાય છે કે તેના બદલે મોટા સ્ટારને સાઇન કરવામાં આવ્યો છે. જોકે એ વિશે તેને જણાવવામાં પણ નહોતું આવ્યું.

શેફાલી શાહ

શેફાલી શાહે જણાવ્યું હતું કે એક ફિલ્મ તેણે સાઇન કરી અને અચાનક બીજા દિવસે જાણ થાય છે કે તેના બદલે મોટા સ્ટારને સાઇન કરવામાં આવ્યો છે. જોકે એ વિશે તેને જણાવવામાં પણ નહોતું આવ્યું. એ પ્રોજેક્ટ કે એ વ્યક્તિ વિશે તેણે ખુલાસો નથી કર્યો. હાલમાં શેફાલી તેની ઍક્ટિંગના દમ પર ઇન્ડસ્ટ્રીમાં ખૂબ જાણીતું નામ બની ગઈ છે. પોતાની સાથે થયેલી એ ઘટનાને યાદ કરતાં શેફાલીએ કહ્યું કે ‘કોઈએ મને પ્રોજેક્ટ માટે સાઇન કરી હતી અને મને બીજા દિવસે જાણ થઈ કે હું એ પ્રોજેક્ટમાં નથી. કંઈ પણ થઈ શકે છે. મને જાણ નહોતી કે લોકો કેવી રીતે વર્તન કરે છે. એથી એ ઘટનાની મારી સાથે કંઈ લેવાદેવા નહોતી જેટલી કે એ વ્યક્તિ સાથે હતી. ફાઇનલી એ રોલ મોટા સ્ટારને મળ્યો. એમાં કોઈ વિવાદ નથી. એ તો ડિરેક્ટરનો અધિકાર છે. જોકે એ બધી વિગતની માહિતી આપવાનું કામ જરૂરી હતું. કાં તો ડિરેક્ટર કૉલ કરીને જણાવે કે હું માફી માગું છું કેમ કે અમને લાગે છે કે કોઈ સ્ટાર આ ફિલ્મ માટે યોગ્ય છે. આ એક માનવતા છે. આ મૂળભૂત નમ્રતા છે. એ વિશે મને ખૂબ ખરાબ લાગ્યું હતું. મને જાણ થઈ કે તેમણે મોટા સ્ટારને કાસ્ટ કર્યો હતો. તે સ્ટાર હતો, હું સ્ટાર નહોતી. હું એક ઍક્ટર હતી. ખરેખર એનાથી મને દુઃખ તો થયું. એક સમજદારી દેખાડવાની હોય છે. ‘અરે બાબા બતા તો દેતે’ બીજી વસ્તુ એ કે મેં સારો રોલ ગુમાવી દીધો હતો એનું દુઃખ હતું.’