વિપુલ શાહ સાથે કામ કરવા માટે ‘હ્યુમન’ને પસંદ કરી હતી રામ કપૂરે

રામ કપૂરનું કહેવું છે કે તેણે વિપુલ શાહ સાથે કામ કરવાનું સપનું હોવાથી તેણે ‘હ્યુમન’માં કામ કરવાની હા પાડી હતી.

રામ કપૂર

રામ કપૂરનું કહેવું છે કે તેણે વિપુલ શાહ સાથે કામ કરવાનું સપનું હોવાથી તેણે ‘હ્યુમન’માં કામ કરવાની હા પાડી હતી. આ મેડિકલ ડ્રામામાં શેફાલી શાહ, કીર્તિ કુલ્હારી, સીમા બિસ્વાસ, આદિત્ય શ્રીવાસ્તવ અને મોહન અગાશે પણ જોવા મળશે. આજથી આ શોની શરૂઆત ડિઝની + હૉટસ્ટાર પર થવાની છે. વિપુલ શાહ અને મોઝેઝ સિંહે સાથે મળીને એને ડિરેક્ટ કરી છે. આ સસ્પેન્સ થ્રિલરમાં લોકો પર કરવામાં આવતી ડ્રગની ટ્રાયલ પર પ્રકાશ પાડવામાં આવશે. એના દ્વારા કેટલાંક રહસ્યો પરથી પડદો ઉઠાવવામાં આવશે. આ શોમાં કામ કરવા માટે હામી ભરવાનું કારણ જણાવતાં રામ કપૂરે કહ્યું કે ‘ખૂબ જ સીધી વાત છે અને એ આ શોમાં સંકળાયેલા લોકો છે. હું કરીઅરમાં જે લેવલ પર છું ત્યારે મારા માટે અગત્યનું છે કે મને જે પ્રકારના લોકો ગમતા હોય, જેમને હું માન આપતો હોઉં અને જેમની સાથે રહેવું ગમતું હોય એ પ્રોજેક્ટ કરું. આખી ટીમમાં વિપુલ અને શેફાલી ડાર્લિંગ્સ છે. મેં શેફાલી સાથે અગાઉ પણ કામ કર્યું છે અને એ ખરેખર અદ્ભુત છે. મારું સપનું હતું કે હું વિપુલ સાથે કામ કરું, બધું જ પર્ફેક્ટ હતું. એથી હું ના ન કહી શક્યો.’