16 March, 2020 03:53 PM IST | Mumbai | Mumbai Correspondent
શિલ્પા શિંદે
‘બિગ બૉસ 11’ની વિજેતા શિલ્પા શિંદેએ થોડા દિવસો પહેલાં ખુલાસો કર્યો હતો કે તેનું સિદ્ધાર્થ શુક્લા સાથે અફેર હતું. સિદ્ધાર્થ પર અનેક આરોપો મૂકતાં શિલ્પાએ જણાવ્યું હતું કે તે તેને મારતો પણ હતો. સિદ્ધાર્થે આ વખતે ‘બિગ બૉસ 13’નું ટાઇટલ જીત્યું હતું. શિલ્પાએ કહેલી એ તમામ વાતો વિશે પ્રતિક્રિયા આપતાં સિદ્ધાર્થે કહ્યું હતું કે ‘આ બધી અફવાઓ મારા પર કોઈ અસર નથી કરવાની. જો તમે કોઈના પર પથ્થર ફેંકો તો એનાથી જાણ થાય છે કે તમે પોતે કેટલા અસુરક્ષિત છો. આ બધુ સાંભળીને મને દુ:ખ થાય છે. આશા રાખું છું કે આવા લોકો ભવિષ્યમાં ફરી પાછું આવું કંઈ ન કરે. આ બધી કમેન્ટ્સ ખૂબ વિચિત્ર છે. ધારો કે કોઈ અચાનક સામે આવીને કહે કે ‘હું તારી સાથે રિલેશનશિપમાં છું’ એ ક્રેઝી બાબત છે. તમે એ વ્યક્તિને ડેટ કરતા હો કાં તો ન પણ કરતા હો એ અલગ વાત છે, પરંતુ તમને હમણાં રિલેશનશિપ વિશે બોલવાની શું જરૂર પડી?’