પહેલી વાર ગુજરાતી પાત્રમાં દેખાશે અમિતાભ

આનંદ પંડિતની ગુજરાતી ફિલ્મ ‘ફક્ત મહિલાઓ માટે’માં તેઓ નાનકડી ભૂમિકામાં દેખાશે

અમિતાભ બચ્ચન

આનંદ પંડિતની ગુજરાતી ફિલ્મ ‘ફક્ત મહિલાઓ માટે’માં અ​મિતાભ બચ્ચન ગુજરાતી પાત્ર ભજવતા જોવા મળશે. તેમણે અગાઉ ‘ચેહરે’માં સાથે કામ કર્યું હતું અને તેઓ ફરી સાથે કામ કરી રહ્યા છે. યશ સોની અને દીક્ષા જોષીની ‘ફક્ત મહિલાઓ માટે’માં​ અમિતાભ બચ્ચન નાનકડી ભૂમિકામાં જોવા મળશે. આનંદ પંડિત હવે મરાઠી અને ગુજરાતી ફિલ્મોને પણ પ્રોડ્યુસ કરી રહ્યા છે. વિશાલ શાહ સાથે તેમણે આ ગુજરાતી ફિલ્મને પ્રોડ્યુસ કરી છે જેને જય બોડાસ દ્વારા ડિરેક્ટ કરવામાં આવી છે. ૧૯ ઑગસ્ટે રિલીઝ થઈ રહેલી આ એક ફૅમિલી સેન્ટ્રિક કૉમેડી ફિલ્મ છે. આ વિશે આનંદ પંડિતે કહ્યું હતું કે ‘અમિતજી વગર એક પણ પ્રોજેક્ટ વિશે વિચારવું પણ મુશ્કેલ છે. તેઓ મારા સારા ફ્રેન્ડ, મેન્ટર અને ગાઇડ છે. મેં તેમને જ્યારે ‘ફક્ત મહિલાઓ માટે’માં નાનકડી ભૂમિકા માટે પૂછ્યું કે તેમણે તરત જ હા પાડી દીધી હતી. તેમણે મને કોઈ સવાલ નહોતો કર્યો. 
ન તો સ્ક્રિપ્ટ માગી, ન તો ડિરેક્ટર 
વિશે પૂછ્યું. તેઓ સીધા સેટ પર 
આવી ગયા હતા. આ પહેલી વાર છે કે ​અમિતજી ગુજરાતી ફિલ્મમાં ગુજરાતી પાત્ર ભજવી રહ્યા છે. સેટ પર અમિતજીની હાજરીથી દરેક જણ ખૂબ જ ખુશ થઈ ગયા હતા, જેમાં મારા કો-પ્રોડ્યુસર વિશાલ શાહની સાથે કાસ્ટ અને ક્રૂનો પણ સમાવેશ થાય છે. અમિતજીએ સેટ પર જ્યારે સ્ક્રિપ્ટ સાંભળી હતી ત્યારે તેઓ એ ટ્વિસ્ટને લઈને ખૂબ જ હસ્યા હતા. તેઓ હંમેશાંની જેમ સેટ પર સમયસર આવી ગયા હતા અને તેમનું કામ 
પૂરું કર્યું હતું. તેમને ખૂબ જ સારું ગુજરાતી બોલતા જોઈને બધા સરપ્રાઇઝ થઈ ગયા હતા. જોકે ઘણા ઓછા લોકોને ખબર હશે કે તેઓ કોઈ પણ ભાષાને જલદીથી પકડી લે છે. મેં તેમને ‘લાવારિસ’ના એક દૃશ્યમાં ઘણી ભાષા સાથે બોલતા જોયા હતા. એ દિવસે મને નહોતી જાણ કે તેઓ મારા માટે મારી ગુજરાતી ફિલ્મમાં કામ કરશે.’