05 March, 2026 11:50 AM IST | Mumbai | Gujarati Mid-day Correspondent
સુનીલ શેટ્ટી
સુનીલ શેટ્ટીએ પોતાના દીકરા અહાન શેટ્ટીની ફિલ્મ ‘બૉર્ડર 2’નું જોરદાર પ્રમોશન કર્યું હતું. સુનીલે ફિલ્મ રિલીઝ પહેલાં જ નક્કી કર્યું હતું કે જ્યાં સુધી ફિલ્મ ૫૦૦ કરોડ રૂપિયાની કમાણી નહીં કરે ત્યાં સુધી તે આ ફિલ્મ જોવા નહીં જાય. આ ફિલ્મ હજી સુધી આ આંકડાને પહોંચી શકી નથી અને એટલે સુનીલે પોતાનું આ વચન અત્યાર સુધી નિભાવ્યું છે અને હજી સુધી થિયેટરમાં જઈને ફિલ્મ જોઈ નથી.
‘બૉર્ડર 2’ ૧૯૯૭માં આવેલી ફિલ્મ ‘બૉર્ડર’નો બીજો ભાગ છે. આ ફિલ્મને રિલીઝને એક મહિનાથી વધુ સમય થઈ ગયો હોવા છતાં ફિલ્મ હજી સુધી ૫૦૦ કરોડના આંકડાને સ્પર્શી શકી નથી છતાં સુનીલ શેટ્ટીને આશા છે કે ફિલ્મ આ માઇલસ્ટોન સુધી ચોક્કસ પહોંચશે.
એક ઇવેન્ટ દરમ્યાન સુનીલ શેટ્ટીએ પોતાના વચન વિશે કહ્યું હતું કે ‘મેં આ નિર્ણય ફિલ્મની રિલીઝ પહેલાં જ લીધો હતો, કારણ કે આ દેશભક્તિ પર આધારિત ફિલ્મ છે અને એણે ચોક્કસ ૫૦૦ કરોડનો આંકડો પાર કરવો જોઈએ અને મેં નક્કી કર્યું કે એ પછી જ હું ફિલ્મ જોઈશ.’
