21 February, 2026 11:39 AM IST | Mumbai | Gujarati Mid-day Correspondent
સુભાષ ઘઈની ફિલ્મોના આધારે બનાવવામાં આવશે ઍનિમેટેડ શો
ફિલ્મમેકર સુભાષ ઘઈની ‘કાલીચરણ’, ‘હીરો’, ‘ખલનાયક’ અને ‘સૌદાગર’ જેવી ફિલ્મો આજે પણ દર્શકોમાં લોકપ્રિય છે. હવે આ ક્લાસિક ફિલ્મોના આધારે ઍનિમેટેડ શો અને ફિલ્મો બનાવવાની તૈયારી શરૂ થઈ ગઈ છે. આ માટે સુભાષ ઘઈની કંપની મુક્તા આર્ટ્સ અને ગ્રીન ગોલ્ડ ઍનિમેશન વચ્ચે સત્તાવાર કરાર કરવામાં આવ્યો છે. આ પ્રોજેક્ટ માટે આ બન્ને કંપનીઓ દ્વારા મેમોરેન્ડમ ઑફ અન્ડરસ્ટૅન્ડિંગ (MOU) પર સાઇન કરવામાં આવી છે. આ ભાગીદારીનો હેતુ ક્લાસિક કહાનીઓને નવી પેઢી સુધી આધુનિક માધ્યમ દ્વારા પહોંચાડવાનો છે. આ કરાર હેઠળ ‘કર્ઝ’, ‘કર્મા’, ‘રામ લખન’, ‘ઇકબાલ’ સહિત અનેક ફિલ્મોથી પ્રેરિત ઍનિમેટેડ ફિલ્મો તૈયાર થશે. આમાં મૂળ કહાનીઓ ઉપરાંત પાત્રો પર આધારિત સ્પિન-ઑફ પ્રોજેક્ટ્સ પણ સામેલ રહેશે.
ઍનિમેશન ક્ષેત્રમાં વિસ્તરણ માટે મુક્તા આર્ટ્સે ૨૦૨૫માં SGM ઍનિમેશન સ્ટુડિયો શરૂ કર્યો હતો, જે કંપનીનો ઍનિમેશન અને ગેમ્સ વિભાગ છે. આ સ્ટુડિયો ઍનિમેટેડ ફિલ્મો, વેબ-સિરીઝ, કૉમિક બુક્સ અને ગેમ્સના વિકાસ, નિર્માણ અને સહપ્રોડક્શન પર કામ કરશે.
