સોનાક્ષી ધર્મસંકટમાં : પિતાના મિત્રની ફિલ્મ છોડી અરબાઝની ફિલ્મ પકડી
સોનાક્ષી સિંહા થોડા દિવસ પહેલાં જબરદસ્ત મુશ્કેલીમાં મુકાઈ ગઈ હતી. એક તરફ પોતાને પહેલી જ ફિલ્મથી સ્ટાર બનાવનાર ‘દબંગ’ની સીક્વલ અને બીજી તરફ તેનો મનપસંદ ગ્લૅમરસ રોલ ધરાવતી તથા પિતાના અંગત મિત્રો અબ્બાસ-મસ્તાનની ‘રેસ’ની સીક્વલમાંથી કોઈ એકની તેને પસંદગી કરવી પડી હતી. ‘દબંગ ૨’માં જેટલી ટીમ કામ કરે એ માત્ર એ જ ફિલ્મ પર કામ કરી રહી હોય એવી અરબાઝ ખાનની ઇચ્છાને માન આપી સોનાક્ષીએ અંતે અબ્બાસ-મસ્તાનની ફિલ્મ છોડવી પડી હતી.
સોનાક્ષીની કરીઅરને પહેલી ફિલ્મથી જ ઊંચાઈ આપી હોવાને કારણે તે ‘દબંગ’ને વધુ મહત્વ આપે એ સ્વાભાવિક હતું. જોકે બીજી તરફ ‘રેસ ૨’માં તે પહેલી વખત એક ગ્લૅમરસ અવતારમાં દેખાવાની હતી અને એ માટે તેણે ઘણી તૈયારીઓ પણ કરવાનું વિચાર્યું હતું. આ ઉપરાંત શત્રુઘ્ન અને પૂનમ સિંહા સાથે અબ્બાસ-મસ્તાનની મિત્રતા ઘણી સારી હોવાને લીધે સોનાક્ષી તરત જ ફિલ્મ માટે ના પાડી શકે એમ નહોતી. જોકે તેને નિર્ણય ખૂબ જ ઓછા સમયમાં લેવાનું કહેવામાં આવ્યું હતું.
અરબાઝ ખાને જ્યારે ‘દબંગ ૨’ ડિરેક્ટ કરવાનો નિર્ણય લીધો ત્યારથી એક વાત તેણે પકડી રાખી છે કે ફિલ્મમાં તે કહેશે એ પ્રકારે જ ટીમ અને કાસ્ટનું સિલેક્શન થશે. આ ઉપરાંત મૂળ ફિલ્મની ટીમના ઘણા સભ્યો ડિરેક્ટર અભિનવ સિંહ કશ્યપથી નજીક હોવાને લીધે તેમણે આ સીક્વલ છોડી પણ હતી. આ કારણે જ અરબાઝને લાગવા માંડ્યું હતું કે મૂળ ફિલ્મની જે ટીમ સીક્વલમાં નથી એ તમામ લોકો અભિનવ સિંહ કશ્યપની નજીકના છે. આ કારણે પણ સોનાક્ષીએ ‘દબંગ ૨’ કરવી પડે એવા જ સંજોગો ઊભા થયા હતા.
બન્ને ફિલ્મોનું શૂટિંગ માર્ચ-૨૦૧૨થી શરૂ થવાનું હતું. જોકે સંભાવનાઓ હતી કે સોનાક્ષીના શેડ્યુલને દીપિકાના શેડ્યુલની જેમ જ તેની તારીખો મુજબ બદલવામાં આવે, પણ સોનાક્ષીનાં અરમાનો પર પાણી ફરી વળ્યાં હતાં.
અબ્બાસ-મસ્તાનના અબ્બાસ કહે છે, ‘હા, સોનાક્ષીએ અમને ફોન કરીને કહ્યું હતું કે તેને ‘દબંગ’ની સીક્વલમાં કામ કરવું છે. તેને હા પાડવા સિવાય અમારી પાસે કોઈ વિકલ્પ પણ નહોતો.’