24 March, 2020 07:40 PM IST | Mumbai | Gujarati Mid-day Online Correspondent
ગાયક-અભિનેતા મિયાંગ ચાંગ
ઈન્ડિયન આઈડલ ત્રણથી કૅરિયરની શરૂઆત કરનાર અને ચાહકોના દિલમાં જગ્યા બનાવનાર ગાયક-અભિનેતા મિયાંગ ચાંગને તાજેતરમાં બહુ કડવો અનુભવ થયો હતો. Times Of India ને આપેલા ઈન્ટરવ્યુમાં ચાંગે જણાવ્યું હતુ કે, મુંબઈમાં બાઈક પર જતા બે છોકરાઓ મને 'કોરોના' કહીને ત્યાંથી ભાગી ગયા હતા. પણ એ લોકોએ જ્યારે મને આવુ કહ્યું ત્યારે મને બહુ દુખ થયું હતું.
ચાંગે વધુમાં જણાવ્યું હતું કે, હું દરરોજ મારા ઘર પાસે જોગિંગ કરવા જાવ છું. એક દિવસ જોગિંગ કરતો હતો ત્યારે બે છોકરાઓ બાઈક સાથે મારી પાસેથી પસાર થયા અને 'કોરોના' એવી બુમ પાડીને ભાગી ગયા. હું પણ તેમની સામે બુમ પાડવા માંગતો હતો, મારે પણ તેમને ગાળો આપવી હતી. પરંતુ મને તે યોગ્ય લાગ્યું નહીં. મને ત્યારે બહુ જ દુખ થયું. જોકે આ પ્રકારની ટિપ્પણીઓની મને આદત થઈ ગઈ છે. મને બહુ તકલીફ થાય છે પણ હું દર વખતે આગળ વધવાનો પ્રયાસ કરું છું.
મિયાંગનો જન્મ ઝારખંડના ધનબાદમાં થયો છે અને તેના પરિવારની ત્રણ પેઢી ભારતમાં જ જન્મી છે. પરંતુ તેના અલગ દેખાવને કારણે તે અનેકવાર ટિકાઓનો ભોગ બન્યો છે. તેને લોકો અનેક વાર ચાઈનિઝ, ચીની, નેપાલી વગેરે કહીને બોલાવતા હોય છે. ગાયકે યશરાજ ફિલ્મની બદમાશ કંપનીમાં શાહિદ કપુર અને અનુષ્કા શર્મા સાથે કામ કર્યું છે.