શાહરુખ ખાનની કિંગથી એડ શીરનનો બૉલીવુડમાં પ્રવેશ?

એક ફૅન-ક્લબ સાથેની વાતચીતમાં એડે સ્પષ્ટતા કરી છે કે તેણે શાહરુખ ખાનની બૉલીવુડ ફિલ્મ માટે હિન્દીમાં પણ ગીત ગાયું છે

શાહરુખ ખાન અને એડ શીરન

શાહરુખ ખાન છેલ્લા કેટલાક દિવસથી તેની આગામી ફિલ્મ ‘કિંગ’ની અલગ-અલગ અપડેટ્સને કારણે ચર્ચામાં છે. હવે ચર્ચા છે કે લોકપ્રિય પૉપ સિંગર એડ શીરન ‘કિંગ’માં ગીત ગાઈને બૉલીવુડ પ્રવેશ કરવાનો છે. હાલમાં એડ શીરનનું ગીત ‘સફાયર’ રીલ્સમાં ખૂબ જ ટ્રેન્ડમાં છે. આ ગીતમાં એડ શીરન ગીતની કેટલીક લાઇન્સ પંજાબીમાં ગાતો જોવા મળે છે. હાલમાં એડે ‘સફાયર’નો એક બિહાઇન્ડ-ધ-સીન (BTS) વિડિયો શૅર કર્યો હતો, જેમાં તે પંજાબીમાં કેટલીક લાઇન્સ રેકૉર્ડ કરતો અને હિન્દીમાં ગીત વિશે વાત કરતો દેખાઈ રહ્યો હતો.

એક ફૅન-ક્લબ સાથેની વાતચીતમાં એડે સ્પષ્ટતા કરી છે કે તેણે શાહરુખ ખાનની બૉલીવુડ ફિલ્મ માટે હિન્દીમાં પણ ગીત ગાયું છે. એડની આ સ્પષ્ટતા પછી ચર્ચા છે કે તેણે શાહરુખની ‘કિંગ’માં ગીત ગાયું છે. શાહરુખ ખાનની ‘કિંગ’નું ડિરેક્શન સિદ્ધાર્થ આનંદે કર્યું છે. આમાં શાહરુખ સાથે તેની દીકરી સુહાના ખાન પણ જોવા મળશે.