24 December, 2014 05:15 AM IST |
રશ્મિન શાહ
૨૦૧૨માં રિલીઝ થયેલી ‘OMG’ (ઓહ માય ગૉડ!) અને શુક્રવારે રિલીઝ થયેલી આમિર ખાનની ‘Pk’ વચ્ચે ઘણું સામ્ય છે એવા એકધારા આવી રહેલા મીડિયા-રિપોર્ટથી ડિરેક્ટર રાજકુમાર હીરાણી અને ડિરેક્ટર ઉમેશ શુક્લ અપસેટ થયા છે. ગઈ કાલે જ્યારે રાજકુમાર હીરાણી સાથે આ બાબતે વાત કરવાની કોશિશ કરવામાં આવી ત્યારે તેમણે વાત કરવાની ના પાડતાં બળાપો કાઢ્યો હતો અને કહ્યું હતું કે મીડિયા છેલ્લે તો એ જ લખવાનું છે જે તેમને મનગમતું છે એટલે વાત કરવાનો કોઈ અર્થ નથી.
‘OMG’ના ડિરેક્ટર ઉમેશ શુક્લની પણ કંઈક એવી જ હાલત હતી. એકધારા સવાલથી કંટાળીને તેમણે ગઈ કાલે મોબાઇલ સ્વિચ્ડ-ઑફ કરી દીધો હતો. ઉમેશ શુક્લએ કહ્યું હતું કે ‘જો લવ-સ્ટોરી હોય તો એમાં આઇ લવ યુ આવે, આવે અને આવે જ. સ્વાભાવિક છે કે ભગવાનની વાર્તા હોય તો એમાં ભગવાન, પૂજારી, તેમના ચમચાઓ બધા આવે. આને કારણે એવું ન કહી શકાય કે બન્ને ફિલ્મનો સબ્જેક્ટ એક જ છે. બન્ને ફિલ્મ જુદી છે અને એકમેકથી બધી રીતે ડિફરન્ટ છે. આવી સરખામણી કોઈ હિસાબે ન થવી જોઈએ.’