કંગના કરી રહી છે ગૅન્ગસ્ટરનો રોલ કરવાની તૈયારી

કંગના કરી રહી છે ગૅન્ગસ્ટરનો રોલ કરવાની તૈયારી

કંગના રનૌત હાલમાં પોતાની એક આગામી ફિલ્મ માટે ગૅન્ગસ્ટરનો રોલ ભજવવાની તૈયારી કરી રહી છે.

આ વિશે વાત કરતાં ફિલ્મ સાથે સંકળાયેલી એક વ્યક્તિ કહે છે, ‘તાજેતરમાં આ ફિલ્મ માટે કંગનાને સાઇન કરવામાં આવી છે. બદલો લેવાની વાર્તાવાળી આ ફિલ્મમાં કંગના ગૅન્ગસ્ટરનો રોલ ભજવી રહી છે અને ગન ચલાવતી જોવા મળશે. કંગનાએ આ પહેલાં ડાર્ક શેડવાળા અને કૉમેડી એમ બન્ને પ્રકારના રોલ કર્યા છે અને તે હવે આ રોલથી નવો પ્રયોગ કરવા માગે છે.’

નોંધનીય છે કે આ ફિલ્મમાં પહેલાં સર્જકો તબુને સાઇન કરવા માગતા હતા, પણ તેણે આ રોલ માટે ના પાડતાં પછી તેમણે આના માટે કંગનાની પસંદગી કરી છે. આ ફિલ્મના લેખક અને ડિરેક્ટર સાંઈ કબીરે આ પહેલાં સંજય દત્ત અભિનીત ‘લમ્હા’ના સંવાદો લખ્યા છે તેમ જ શાહિદ કપૂર અને વિદ્યા બાલન અભિનિત ‘કિસ્મત કનેક્શન’નો સ્ક્રીનપ્લે પણ લખ્યો છે.