03 December, 2019 10:18 AM IST | Mumbai
રિતેશ દેશમુખ
સાજિદ નડિયાદવાલાએ ‘હાઉસફુલ 5’ બનાવવાની વાતને કન્ફર્મ કરતાં જણાવ્યું છે કે આ ફિલ્મમાં અક્ષયકુમાર અને રિતેશ દેશમુખની એન્ટ્રી તો પાક્કી છે. આ ફિલ્મની સ્ક્રિપ્ટ પર કામ શરૂ થવાનું હજી બાકી છે. સાથે જ આ ફિલ્મમાં ‘હાઉસફુલ’ સિરીઝનાં મોટાભાગનાં કલાકારોને પણ સામેલ કરવામાં આવશે એવી ચર્ચા છે. આ સિરીઝમાં દીપિકા પાદુકોણ, અર્જુન રામપાલ, બમન ઇરાની, રણધીર કપૂર, રિશી કપૂર, જૉન એબ્રાહમ, અભિષેક બચ્ચન, જૅકી શ્રોફ અને ચંકી પાન્ડે જેવા ઍક્ટર્સ જોવા મળ્યા હતાં. દિવાળી દરમ્યાન રિલીઝ થયેલી ‘હાઉસફુલ 4’ લોકોને ખૂબ પસંદ પડી હતી. બૉક્સ-ઑફિસ પર આ ફિલ્મે ૧૯૪.૩૧ કરોડનો બિઝનેસ કર્યો હતો. ‘હાઉસફુલ 5’ વિશે જણાવતાં પ્રોડ્યુસર સાજિદ નડિયાદવાલાએ કહ્યું હતું કે ‘અમે હજી સુધી ‘હાઉસફુલ 5’ની સ્ક્રિપ્ટ પર કામ શરૂ નથી કર્યું. આશા રાખીએ છીએ કે અમને જલદી જ યોગ્ય સ્ક્રિપ્ટ મળી જશે. ત્યાર બાદ અમે કલાકારો વિશે ચોક્કસ નિર્ણય લઈશું. જોકે હા અક્ષયકુમાર અને રિતેશ દેશમુખ તો ‘હાઉસફુલ’નાં અગત્યનાં કલાકારો છે અને તેઓ આ ફિલ્મમાં પણ જોવા મળશે.’