01 December, 2022 02:29 PM IST | Mumbai | Gujarati Mid-day Correspondent
રિતેશ દેશમુખ
રિતેશ દેશમુખ અને તેની પત્ની જેનિલિયા દેશમુખની કંપની દેશ ઍગ્રો પ્રાઇવેટ લિમિટેડને આપેલી કન્ટ્રોવર્શિયલ લોનની તપાસ કરવાનો આદેશ આપવામાં આવ્યો છે. કો-ઑપરેશન મિનિસ્ટર અતુલ સાવે દ્વારા આ તપાસનો આદેશ આપવામાં આવ્યો છે. લાતુર ડિસ્ટ્રિક્ટ સેન્ટ્રલ કો-ઑપરેટિવ બૅન્ક દ્વારા રિતેશની કંપનીને ૧૧૬ કરોડ રૂપિયાની લોન આપી હતી. આ લોન બે ઇન્સ્ટૉલમેન્ટમાં એટલે કે ઑક્ટોબર ૨૦૨૧ અને જુલાઈ ૨૦૨૨માં આપી હતી. આ લોન ચોક્કસ નીતિનિયમ મુજબ આપવામાં આવી ન હોવાથી તપાસનો આદેશ આપવામાં આવ્યો છે.
રિતેશનો મોટો ભાઈ અમિત દેશમુખ એમવીએ સરકારમાં મિનિસ્ટર હતો અને તેનો નાનો ભાઈ કૉન્ગ્રેસ એમએલએ ધીરજ દેશમુખ એ સમયે બૅન્કનો ચૅરમૅન હતો, એથી લોન રિતેશને પૉલિટિકલ કનેક્શનથી મળી હતી અને એથી જ એની તપાસનો આદેશ આપવામાં આવ્યો છે. લોન સામે પૂરતી સિક્યૉરિટી લેવામાં આવી હતી કે નહીં એની તપાસ કરવામાં આવી રહી છે અને એ માટે જરૂરી માહિતી આપવા માટે દરેક પાર્ટીને સૂચના આપવામાં આવી છે. જોકે ગયા મહિને જ રિતેશની કંપની દ્વારા આ આરોપને ફગાવી દેવામાં આવ્યા હતા અને સ્ટેટમેન્ટમાં કહ્યું હતું કે દરેક વસ્તુ કાયદેસર રીતે થઈ છે. જોકે હવે એની તપાસ કરવાનો આદેશ આપવામાં આવ્યો છે.