આજે ‘ગૅન્ગ્સ ઑફ વાસેપુર ૨’નું ઝારખંડના ધનબાદમાં પ્રીમિયર
ફિલ્મનાં અનેક પાત્રો આ જ વિસ્તારના રિયલ ગૅન્ગસ્ટર્સ પરથી લખવામાં આવ્યાં છે. આમાંથી કેટલાક રિયલ ગૅન્ગસ્ટર તો અત્યારે જેલમાં બંધ છે. ચર્ચા છે કે હાલમાં અનેક ગુનાઓના આરોપસર ધનબાદ જેલમાં બંધ ધનબાદનો નામચીન માફિયા ફહીમ ખાન પોતાના માણસો મારફત ડિરેક્ટર અનુરાગ કશ્યપની કોલસા-માફિયાઓ પર આધારિત ‘ગૅન્ગ્સ ઑફ વાસેપુર’ના બીજા ભાગ પર ચાંપતી નજર રાખી રહ્યો છે, કારણ કે બીજા ભાગની વાર્તાની પ્રેરણા તેની રિયલ લાઇફ પરથી લેવામાં આવી છે. જોકે આનાથી ડરવાને બદલે અનુરાગે હવે આ ફિલ્મનું પ્રીમિયર ધનબાદમાં જ રાખવાનો નિર્ણય લીધો છે.
અનુરાગ કશ્યપે પોતે આજે યોજાનારા પ્રીમિયરમાં હાજરી આપવાને સમર્થન આપ્યું છે. જોકે પહેલાં આ ફિલ્મનું મ્યુઝિક ધનબાદમાં રિલીઝ કરવાનું આયોજન હતું, પણ સુરક્ષાનાં કારણોસર આયોજન રદ કરવામાં આવ્યું હતું. ફિલ્મમાં મહત્વનો રોલ ભજવનાર નવાઝુદ્દીન સિદ્દીકી અત્યારે બિપાશા બાસુ સાથે ફિલ્મ ‘આત્મા’ના શૂટિંગમાં વ્યસ્ત હોવાથી ધનબાદના પ્રીમિયરમાં હાજરી નહીં આપી શકે.