26 September, 2020 10:58 AM IST | Mumbai | Gujarati Mid-Day Online Correspondent
ચાહકે સિમ કાર્ડ પર બનાવી સોનુ સૂદની તસવીર
કોરોનાવાયરસ મહામારી દરમિયાન બોલીવુડ અભિનેતા સોનુ સૂદે જરૂરિયાતમંદોની મદદ કરીને બધાનાં મન જીતી લીધાં છે. જે પણ તેની કોઇપણ પ્રકારની મદદ માગે છે તો સોનુ સૂદ મદદ કરે છે. જે રીતે તે લોકોની મદદ કરી રહ્યો છે, તેના દેશની સાથે-સાથે વિદેશમાં પણ ચાહકો બનતા જાય છે. સોનુનાં ચાહકો ટ્વિટર પપ તેને ટૅગ કરી પેઇન્ટિંગ બનાવી રહ્યા છે. સોમિન નામના એક ટ્વિટર યૂઝરે સિમ કાર્ડ પર સોનુ સૂદની તસવીર બનાવી છે. જેના પર અભિનેતાએ સરસ કોમેન્ટ પણ કરી છે જે લોકોને ખૂબ જ ગમી રહી છે.
સોનુ સૂદને ટૅગ કરતાં યૂઝરે એક તસવીર શૅર કરી છે અને કૅપ્શનમાં લખ્યું, "સોનુ સૂદ સર, તમારી તસવીર મેં સિમ કાર્ડ પર પેઇન્ટ કરી છે. તમને કેવી લાગી? અમને તમારા પર ગર્વ છે સર."
અભિનેતાએ મજાકના અંદાજમાં ઇમોજી સાથે જવાબમાં લખ્યું છે કે, "10G નેટવર્ક"
ખૂબ જ ઓછા સમયમાં સોનુ સૂદના આ ટ્વીટને 32 હજાર કરતાં વધારે લાઇક્સ મળી ગયા હતા, અને આ સંખ્યા હજી વધી રહી છે. હજારો લોકોએ આ ટ્વીટને રિટ્વીટ કર્યું છે.