08 May, 2025 07:09 AM IST | New York | Gujarati Mid-day Correspondent
દિલજિતનો મેટ ગાલા લુક
દિલજિત દોસાંઝે મેટ ગાલા 2025માં પોતાના મહારાજાના લુકથી બધાનાં દિલ જીતી લીધાં હતાં. દિલજિતનો આ લુક પટિયાલાના મહારાજા ભૂપિન્દર સિંહથી પ્રેરિત હતો. હકીકતમાં દિલજિતની ઇચ્છા તો મેટ ગાલામાં પટિયાલાના મહારાજાનો ૨૧,૦૦૦ કરોડ રૂપિયાનો સાચો નેકલેસ પહેરવાની હતી જેથી તેનો લુક વધારે ચર્ચામાં રહે, પણ તેની એ ઇચ્છા પૂરી નહોતી થઈ શકી.
દિલજિતની ટીમે જણાવ્યું હતું કે તેમણે આ ખાસ જ્વેલરી એક દિવસ વાપરવા માટે લેવાનો પ્રયાસ કર્યો હતો. ૧૯૨૮માં મહારાજાએ કાર્ટિએર પાસે ૧૦૦૦ કૅરૅટનો ડાયમન્ડ નેકલેસ ઑર્ડર આપીને બનાવડાવ્યો હતો. આ ફ્રેન્ચ જ્વેલરી બ્રૅન્ડનો આ નેકલેસ સૌથી મોટો નેકલેસ હતો. આ નેકલેસમાં ૨૯૦૦ ડાયમન્ડ જડેલા હતા. એ વખતે એની કિંમત ૧૦ કરોડ હતી જે હવે ૨૧,૦૦૦ કરોડ જેટલી થઈ છે.
દિલજિતે આ નેકલેસ ઉધાર લેવાનો પ્રયાસ કર્યો હતો, પણ તેને કહેવામાં આવ્યું કે આ નેકલેસ મ્યુઝિયમમાં સીલ કર્યો છે. આખરે દિલજિતે ભારતીય જ્વેલરી ડિઝાઇનર પાસેથી મહારાજા જેવી જ્વેલરી બનાવડાવી હતી અને મેટ ગાલા 2025માં પહેરી હતી.