26 February, 2020 03:38 PM IST | Ahmedabad | Parth Dave
સોનમ કપૂર
નેટફ્લિક્સની અપકમિંગ ઓરિજિનલ મૂવી ‘AK વર્સસ AK’માં એવરગ્રીન અભિનેતા અનિલ કપૂર અને ‘ગૅન્ગ્સ ઑફ વાસેપુર’ ફેમ ડિરેક્ટર અનુરાગ કશ્યપ જોવા મળશે. વિક્રમાદિત્ય મોટવાની નિર્દેશિત આ ફિલ્મનું શૂટિંગ હાલમાં ધારાવીના સ્લમ એરિયામાં થઈ રહ્યું છે. વિક્રમાદિત્ય મોટવાની ‘ઉડાન’, ‘લૂટેરા’, ટ્રેપ્ડ’ જેવી ફિલ્મોના ડિરેક્ટર તેમ જ ‘હસી તો ફસી’, ‘ક્વીન’, ‘મસાન’, ‘એનએચ ૧૦’, ‘ઉડતા પંજાબ’ વગેરેના પ્રોડ્યુસર રહી ચૂક્યા છે. નેટફ્લિક્સ માટે જ ‘સેક્રેડ ગેમ્સ’ બનાવ્યા બાદ હવે તેઓ ‘AK વર્સસ AK’ લઈને આવી રહ્યા છે.
આ ફિલ્મમાં એક ફિલ્મ-ડિરેક્ટર (અનુરાગ કશ્યપ) જાણીતા ફિલ્મસ્ટારની દીકરી (સોનમ કપૂર)ને કિડનૅપ કરે છે અને પછી થ્રિલિંગ ડ્રામા શરૂ થાય છે. ‘AK વર્સસ AK’ એટલે કે અનિલ કપૂર અને અનુરાગ કશ્યપ નેવર-સીન-બિફોર અવતારમાં જોવા મળશે. આ ફિલ્મની રસપ્રદ વાત એ છે કે અનિલ, અનુરાગ, સોનમ સહિતનાં પાત્રો પોતાના રિયલ નામ અને કામ સાથે દેખાશે. અગાઉ આ ફિલ્મમાં અનિલ કપૂરની જગ્યાએ શાહિદ કપૂર હોવાની ચર્ચા હતી એથી તેનું ટાઇટલ ‘AK વર્સસ SK’ રાખવામાં આવ્યું હતું, પણ શાહિદ આ ફિલ્મ ન કરી શક્યો.
આ ઉપરાંત અનિલ કપૂર સાથે તેનાં બાળકો સોનમ કપૂર આહુજા, રિયા કપૂર અને હર્ષવર્ધન કપૂર પણ આ ફિલ્મમાં જોવા મળશે. અનિલ કપૂર અગાઉ ‘સિલેક્શન ડે’ અને ‘મોગલી- લેજન્ડ ઑફ ધ જંગલ’ માટે નેટફ્લિક્સ સાથે પાર્ટનરશિપ કરી ચૂક્યા છે.