16 October, 2019 01:37 PM IST | મુંબઈ
ફિલ્મ 'વૉર'
બીજી ઑક્ટોબરે રિલીઝ થયેલી ‘વૉર’એ ૧૩ દિવસમાં ૨૭૬.૪૦ કરોડનું કલેક્શન મેળવી લીધું છે. આ કલેક્શન હિન્દી, તામિલ અને તેલુગુ ભાષાની ફિલ્મનું મળીને છે. આ ફિલ્મમાં હૃતિક રોશન અને ટાઇગર શ્રોફની જબરદસ્ત ઍક્શન જોવા મળી રહી છે. લોકોને આ ફિલ્મ ખૂબ પસંદ પડી રહી છે. બૉક્સ-ઑફિસ પર આ ફિલ્મનો જાદુ હજી પણ કાયમ છે. જે સ્પીડમાં ફિલ્મનું કલેક્શન વધી રહ્યું છે એને જોતાં લાગી રહ્યું છે કે આ ફિલ્મ જલદી જ ૩૦૦ કરોડની ક્લબમાં સામેલ થઈ જશે એટલું જ નહીં, આ ફિલ્મ વિદેશમાં સૌથી વધુ બિઝનેસ કરનારી ફિલ્મ પણ બની ગઈ છે. ફિલ્મે વિદેશમાં ૧૧.૨ મિલ્યન ડૉલર એટલે કે ૭૯.૮૦ કરોડનો બિઝનેસ કર્યો છે.
આ પણ વાંચો : પ્રસિદ્ધિ હજી પણ મારા માટે એક જાદુ જેવી છે : વરુણ શર્મા
વાત કરીએ પ્રિયંકા ચોપડા જોનસ અને ફરહાન અખ્તરની ‘ધ સ્કાય ઇઝ પિંક’ની. તો ૧૧ ઑક્ટોબરે રિલીઝ થયેલી આ ફિલ્મે ચાર દિવસમાં ૧૧.૯૫ કરોડનો બિઝનેસ કર્યો છે. એવુ લાગી રહ્યું છે કે આ ફિલ્મ ‘વૉર’ સામે ટકી શકવામાં અસમર્થ છે. જોકે સમય જ જણાવશે કે ‘ધ સ્કાય ઇઝ પિંક’ આવનાર સમયમાં બૉક્સ-ઑફિસ પર શું રંગ દેખાડે છે.