12 August, 2026 07:05 AM IST | Delhi | Gujarati Mid-day Correspondent
પ્રતીકાત્મક તસવીર
ચાલુ નાણાકીય વર્ષમાં ભારતમાં ડાયરેક્ટ ટૅક્સની વસૂલાતમાં વધારો જોવા મળ્યો છે. સરકારી આંકડા અનુસાર ૧૦ ઑગસ્ટ સુધીમાં ચોખ્ખી ડાયરેક્ટ ટૅક્સની વસૂલાત વાર્ષિક ધોરણે ૨૩.૦૯ ટકા વધીને ૮.૧૧ લાખ કરોડ રૂપિયા થઈ છે, જે ગયા વર્ષના સમાન સમયગાળા દરમ્યાન ૬.૫૯ લાખ કરોડ રૂપિયા હતી.
ગ્રોસ ડાયરેક્ટ ટૅક્સની વસૂલાત પણ ૧૯.૭૫ ટકા વધીને ૯.૫૫ લાખ કરોડ રૂપિયા થઈ હતી. આ સમયગાળા દરમ્યાન સરકારે ૧.૪૩ લાખ કરોડ રૂપિયાનું કર-રીફન્ડ જાહેર કર્યું જે ગયા વર્ષના સમાન સમયગાળાની તુલનામાં ૩.૭૯ ટકા વધુ છે.
સરકારી ડેટા મુજબ નેટ કૉર્પોરેટ ટૅક્સની વસૂલાત વધીને ૨.૭૦ લાખ કરોડ રૂપિયા થઈ છે. ગયા વર્ષે ૧૦ ઑગસ્ટ સુધીમાં આ રકમ ૨.૨૬ લાખ કરોડ રૂપિયા હતી. ચોખ્ખી નૉન-કૉર્પોરેટ ટૅક્સની વસૂલાત પણ વધીને ૫.૦૭ લાખ કરોડ રૂપિયા થઈ છે, જે એક વર્ષ પહેલાં ૪.૧૧ લાખ કરોડ રૂપિયા હતી.
STTની વસૂલાતમાં નોંધપાત્ર ઉછાળો
શૅરબજારના વ્યવહારો પર લાદવામાં આવતા સિક્યૉરિટીઝ ટ્રાન્ઝૅક્શન ટૅક્સ (STT)માંથી સરકારને ૧૦ ઑગસ્ટ સુધીમાં ૩૩,૮૨૩.૭૪ કરોડ રૂપિયાની આવક થઈ હતી. ગયા વર્ષની સરખામણીમાં આ આંકડો આશરે ૫૧ ટકાનો વધારો દર્શાવે છે.
