ડેન્જરસ હૈદરાબાદના વિજયરથ સામે કલકત્તાને લય જાળવી રાખવાનો પડકાર

હૈદરાબાદ પાંચ મૅચ અને કલકત્તા બે મૅચથી રહ્યું છે અજેય, સીઝનની પહેલી ટક્કરમાં હૈદરાબાદે ૬૫ રને મેળવી હતી જીત

સનરાઇઝર્સ હૈદરાબાદની બૅટિંગ-પ્રૅક્ટિસ દરમ્યાન હેન્રિક ક્લાસેન સાથે ચર્ચા કરતો ટ્રૅવિસ હેડ, મૅચ પહેલાં હરીફ ટીમની પ્રૅક્ટિસ નિહાળતા કલકત્તાના રિન્કુ સિંહ, વરુણ ચક્રવર્તી અને રચિન રવીન્દ્ર.

IPL 2026ના નવમા ડબલ હેડરની પહેલી ટક્કર આજે હૈદરાબાદના રાજીવ ગાંધી ક્રિકેટ સ્ટેડિયમમાં થશે. નવમાંથી ૬ મૅચ જીતીને હૈદરાબાદની ટીમ સીઝનની ટૉપ-થ્રી ટીમોમાં સામેલ છે. પહેલી ૬ મૅચમાં જીતનો સ્વાદ ચાખ્યા વગર રમનાર કલકત્તા છેલ્લી બે મૅચમાં દિલધડક જીત મેળવીને શાનદાર ફૉર્મમાં છે. છેલ્લી પાંચ મૅચ સતત જીતીને આવેલી ડેન્જરસ હૈદરાબાદની ટીમ સામે કલકત્તા પોતાનો લય જાળવી શકશે કે નહીં એના પર સૌની નજર રહેશે. સીઝનમાં બન્ને ટીમની આ બીજી ટક્કર છે. સીઝનની પહેલી ટક્કરમાં હૈદરાબાદે ૮ વિકેટે ૨૨૬ રન કર્યા હતા. જવાબમાં કલકત્તા ૧૬ ઓવરમાં ૧૬૧ રન કરીને ઑલઆઉટ થયું હતું. રાજીવ ગાંધી ક્રિકેટ સ્ટેડિયમમાં ૨૦૨૩ સુધીમાં કલકત્તાની ટીમને ૧૮ મૅચમાંથી ૧૨ જીત અને ૬ હાર મળી છે. એમાંથી ૭ ટક્કર હોમ-ટીમ હૈદરાબાદ સામે થઈ છે. રસપ્રદ વાત એ છે કે આ ૭ મૅચમાંથી હૈદરાબાદ માત્ર ૩ જીત ૨૦૧૩, ૨૦૧૭ અને ૨૦૧૯માં મેળવી શક્યું છે.

મૅચનો સમય બપોરે ૩.૩૦ વાગ્યાથી

બન્ને ટીમનો હેડ-ટુ-હેડ રેકૉર્ડ
મૅચ	૩૧
કલકત્તાની જીત	૨૦
હૈદરાબાદની જીત	૧૧

હૈદરાબાદની ટીમ પોતાના આ હોમ-ગ્રાઉન્ડ પર ચારમાંથી ત્રણ મૅચ જીતી છે. પહેલી મૅચમાં લખનઉ સામે હાર મળી એ પછી હૈદરાબાદે રાજસ્થાન, ચેન્નઈ અને દિલ્હી સામે સતત જીત મેળવી હતી. તેઓ અહીં ૬૭ મૅચમાંથી ૪૧ મૅચ જીત્યા છે. પચીસ મૅચમાં હાર મળી છે અને એક મૅચ નો-રિઝલ્ટ રહી છે.