20 March, 2026 09:53 AM IST | New Delhi | Gujarati Mid-day Correspondent
ગૌતમ ગંભીરની ફાઇલ તસવીર
ભારતીય મેન્સ ક્રિકેટ ટીમના હેડ કોચ ગૌતમ ગંભીરે દિલ્હી હાઈ કોર્ટમાં અરજી દાખલ કરીને આર્ટિફિશ્યલ ઇન્ટેલિજન્સ (AI), ડીપફેક અને અનધિકૃત કમર્શિયલ ઉપયોગ દ્વારા એની ઓળખના વ્યાપક દુરુપયોગ સામે તાત્કાલિક રાહત માગી છે. અરજીમાં ૧૬ સોશ્યલ મીડિયા અકાઉન્ટ્સ અને ઈ-કૉમર્સ પ્લૅટફૉર્મમાં નામ આપવામાં આવ્યાં છે.
અરજીમાં ગૌતમ ગંભીરે તેની સંમતિ વિના તેના નામ, છબિ, અવાજ અથવા વ્યક્તિત્વનો ઉપયોગ રોકવા માટે કાયમી મનાઈહુકમ માગ્યો છે. તેણે તમામ ઉલ્લંઘન કરતા કન્ટેન્ટને દૂર કરવા અને અંતિમ નિર્ણય ન આવે ત્યાં સુધી આવા કન્ટેન્ટના વધુ પ્રસારને રોકવા માટે તાત્કાલિક વચગાળાના મનાઈહુકમની પણ વિનંતી કરી છે.
ગંભીરે ૨.૫ કરોડ રૂપિયાની નુકસાનીનો દાવો પણ કર્યો છે. ફેસ-સ્વૉપિંગ અને વૉઇસ-ક્લોનિંગ જેવાં AI-ટૂલ્સની મદદથી છેલ્લા કેટલાક સમયથી ગૌતમ ગંભીરના નકલી રાજીનામા દ્વારા અને સિનિયર પ્લેયર્સ સાથેના ખોટા વિડિયો બનાવીને લોકોને ગેરમાર્ગે દોરવાનો અને તેની પ્રતિષ્ઠાને નુકસાન પહોંચાડવાનો પ્રયાસ થઈ રહ્યો હતો.
