08 May, 2026 04:16 PM IST | Mumbai | Gujarati Mid-day Correspondent
હૈદરાબાદ ક્રિકેટ અસોસિએશનના અધિકારીઓ સાથે અંબાતી રાયુડુ
ભારતના ભૂતપૂર્વ ક્રિકેટર અંબાતી રાયુડુને હૈદરાબાદ ક્રિકેટ અસોસિએશન (HCA) માટે ક્રિકેટ ઑપરેશન્સનો ડિરેક્ટર નિયુક્ત કરવામાં આવ્યો છે. ૪૦ વર્ષના અંબાતી રાયુડુનો ત્રણ વર્ષનો કાર્યકાળ તાત્કાલિક શરૂ થઈ ગયો છે. તે હૈદરાબાદમાં ક્રિકેટના ભવિષ્યને આકાર આપવામાં મુખ્ય ભૂમિકા ભજવવા માટે તૈયાર છે.
અંબાતી રાયુડુએ નવી ભૂમિકા અંગે ઉત્સાહ વ્યક્ત કરતાં લખ્યું કે ‘કેટલીક બાબતોને સુધારવાની એક શાનદાર તક છે. હૈદરાબાદ અને તેલંગણમાં હાજર વિશાળ ક્રિકેટપ્રતિભાને ખીલતી જોઈને અને દેશનું પ્રતિનિધિત્વ કરતા વધુ ખેલાડીઓ ઉત્પન્ન કરવામાં મદદ કરવા માટે હું વધુ ઉત્સાહિત છું.’
હૈદરાબાદ ક્રિકેટ અસોસિએશન સાથેના અંબાતી રાયુડુના જૂના વિવાદનો પણ અંત આવ્યો છે. ૨૦૧૯માં તેણે હૈદરાબાદ ક્રિકેટ અસોસિએશનમાં ટીમ-પસંદગીની પ્રક્રિયામાં રાજકીયકરણ અને વ્યાપક ભ્રષ્ટાચારનો આરોપ લગાવ્યો હતો. ૨૦૧૯-’૨૦ ડોમેસ્ટિક સીઝન દરમ્યાન તેણે હૈદરાબાદ છોડીને આંધ્ર પ્રદેશ અને બરોડા માટે રમીને ડોમેસ્ટિક કરીઅરનો અંત કર્યો હતો.
