T20 વર્લ્ડ કપમાં ન રમી શકનાર બે બંગલાદેશી પ્લેયર્સ મેન્ટલ કોમામાં જતા રહ્યા હતા

મોહમ્મદ સલાહુદ્દી

બંગલાદેશની સિનિયર મેન્સ ટીમના સહાયક કોચ મોહમ્મદ સલાહુદ્દીને મહત્ત્વપૂર્ણ ખુલાસો કર્યો છે. બંગલાદેશની વચગાળાની સરકારની મનમાનીને કારણે T20 વર્લ્ડ કપ 2026માં રમવાની તક ગુમાવ્યા બાદ ઘણા બંગલાદેશી ક્રિકેટર્સ પર એની ખરાબ અસર થઈ હતી. બંગલાદેશના સ્થાને ટુર્નામેન્ટમાં સ્કૉટલૅન્ડને સ્થાન મળ્યું હતું. મોહમ્મદ સલાહુદ્દીને નામ આપ્યા વિના કહ્યું હતું કે ‘T20 વર્લ્ડ કપ વિવાદ બાદ બે ખેલાડીઓ પાંચ દિવસ માટે મેન્ટલ કોમામાં જતા રહ્યા હતા. જ્યારે કોઈ ખેલાડી વર્લ્ડ કપ રમવા જાય છે ત્યારે તે પોતાનું ૨૭ વર્ષ જૂનું સ્વપ્ન પોતાની સાથે લઈને જાય છે. તમે એ સ્વપ્નને એક સેકન્ડમાં ચકનાચૂર કરી દીધું હતું.’

T20 વર્લ્ડ કપ 2026ની ૨૦ ટીમમાંથી ઓમાનનું પ્રદર્શન સૌથી વાહિયાત રહ્યું

ઓમાનની ટીમ ૨૦૧૬, ૨૦૨૧, ૨૦૨૪ બાદ આ વર્ષે ચોથી વખત T20 વર્લ્ડ કપ રમી હતી. આ ત્રણેય વર્લ્ડ કપમાં ઓમાનની ટીમ પહેલો રાઉન્ડ રમીને બહાર થઈ છે. ભારતીય મૂળના જતિ1ન્દર સિંહના નેતૃત્વમાં ઓમાનની ટીમ એક પણ મૅચ જીતી ન શકી અને ૨૦ ટીમમાંથી સૌથી તળિયાની ટીમ જેવું પ્રદર્શન કર્યું. આ ટીમના બોલિંગ-યુનિટની ઍવરેજ સૌથી ખરાબ ૫૫.૩૩ની રહી છે. તેમનો બોલિંગ સ્ટ્રાઇક-રેટ ૩૧.૫ અને ઇકૉનૉમી-રેટ ૧૦.૫૩નો હતો. તેમના બૅટિંગ-યુનિટે માત્ર ૬.૨૮ના રન-રેટથી રન કર્યા છે. ઓમાનના બૅટર્સે ઍવરેજ ૧૧.૯૪ રન અને ૧૧.૪મા બૉલ પર વિકેટ ગુમાવી છે. ઓમાનની ટીમ T20 વર્લ્ડ કપની ૧૪ મૅચમાંથી માત્ર બે મૅચ જીતી છે. ૨૦૨૧થી ૨૦૨૬ સુધીમાં ઓમાનની ટીમ સતત ૧૦ મૅચ હારી છે. ટુર્નામેન્ટના ઇતિહાસમાં ઓમાને સતત ૧૦ મૅચ હારવાના બંગલાદેશના ૨૦૦૭ અને ૨૦૧૨ દરમ્યાનના શરમજનક રેકૉર્ડની બરાબરી કરી છે.

ઇટલીના બેન મૅનેન્ટીએ T20 ઑલરાઉન્ડર્સના ICC રૅન્કિંગ્સમાં ૧૬૦ સ્થાનનો હનુમાનકૂદકો માર્યો