21 May, 2026 10:55 AM IST | China | Gujarati Mid-day Correspondent
રણના કિનારે એક નવો ચમત્કાર જોવા મળ્યો છે.
જ્યાં અતિશય શુષ્ક વાતાવરણને કારણે ઘાસનું એક તણખલું પણ નથી ઊગતું એવા ઉત્તર-પશ્ચિમ ચીનના શિનજિઆંગ પ્રાંતમાં આવેલા ટકાલામાકન રણના કિનારે એક નવો ચમત્કાર જોવા મળ્યો છે. એલિજિયાન નામના એક ઉત્સાહી જેન-ઝી ખેડૂતે પોતાની કોઠાસૂઝથી અંદાજે ૫૦ વીઘા જમીન પર ગુલાબની સફળ ખેતી કરીને ઉજ્જડ રણને મનમોહક બગીચામાં ફેરવી દીધું છે.
આ વિસ્તારની કઠિન ભૌગોલિક પરિસ્થિતિઓને જોતાં આ કામ અત્યંત મુશ્કેલ હતું; પરંતુ સરકાર તરફથી મળેલી સબસિડી, પાણી અને વીજળીની અવિરત સુવિધાને કારણે એલિજિયાન આ સાહસમાં સફળ રહ્યો છે. પ્રથમ વર્ષમાં જ ગુલાબના ૯૬ ટકા છોડ સર્વાઇવ થયા છે, જે રણપ્રદેશની દૃષ્ટિએ એક રેકૉર્ડ સમાન છે.
પવન સાથે ઊડતી રેતીને રોકીને એને ફૂલોની ક્યારીઓમાં બદલનારા એલિજિયાનનું કહેવું છે કે આ રણ અગાઉ માત્ર રેતી જ પેદા કરતું હતું, પરંતુ હવે એ સુગંધિત ફૂલોનું ઉત્પાદન કરી રહ્યું છે.
યુવાનના આ પ્રયોગથી રણપ્રદેશ વધતો તો અટકશે, સાથે સ્થાનિક સ્તરે રોજગાર, આવક અને વિકાસની તકો પણ ઊભી થઈ છે.
