30 October, 2026 01:04 PM IST | Jabalpur | Gujarati Mid-day Correspondent
વાઇરલ વિડીયોમાંથી સ્ક્રીનશૉટ
જબલપુરમાં કરવા ચોથના પર્વ પર એક પત્નીએ પતિના લાંબા આયુષ્ય માટે માત્ર ઉપવાસ અને મનોકામના જ નહોતી કરી, પરંતુ તે ખરા અર્થમાં જીવનદાયી બની હતી. બે વર્ષથી દીપક ગુપ્તા નામના પંચાવન વર્ષના ભાઈ કિડનીની ગંભીર બીમારીને કારણે ડાયાલિસિસ પર જીવતા હતા. છેલ્લા ૭ મહિનાથી તો તેમની હાલત ખૂબ જ બગડી ગઈ હતી. એ સમયે પત્ની રશ્મિ ગુપ્તાએ પતિને કિડની ડોનેટ કરી હતી. પચીસ ઑક્ટોબરે રશ્મિ અને દીપક ગુપ્તાનું કિડની ટ્રાન્સપ્લાન્ટનું ઑપરેશન થયું હતું. એ પછી હજીયે બન્ને હૉસ્પિટલમાં જ ભરતી છે. પત્નીની કિડની હવે પતિના શરીરમાં ઍક્ટિવ અને સ્વીકૃત થઈ ગઈ છે અને પતિની હાલત સુધારા પર છે. એમ છતાં હજી ઇન્ટેન્સિવ કૅર યુનિટ (ICU)માં જ સારવાર લઈ રહેલા પતિ માટે પત્નીએ કરવા ચૌથનું વ્રત રાખ્યું હતું અને હૉસ્પિટલમાં જ પૂજા કરી હતી. હૉસ્પિટલ-મૅનેજમેન્ટે પણ તેમને એમ કરવા માટે જરૂરી પ્રોવિઝન કરી આપ્યું હતું. રશ્મિએ હૉસ્પિટલના કપડાંમાં જ વ્હીલચૅર પર બેસીને માસ્ક સાથે જ પતિની દૂરથી પૂજા કરી હતી.
