શું છે આ 370ની બિરયાનીનો વાયરલ ટ્રેન્ડ? વિવાદ વધતાં ટિપ્પણી કરનારે ગુમાવી નોકરી

વિવાદ બાદ, હિમાંશુ જાંગરાએ તેની ટિપ્પણી બદલ માફી માગી. તેણે તેનું સોશિયલ મીડિયા એકાઉન્ટ પણ બંધ કરી દીધું છે. સ્ટેન્ડઅપ કૉમેડિયન કલાકાર પ્રણિત મોરેને પણ આ ઘટના અંગે ટીકાનો સામનો કરવો પડ્યો હતો અને ત્યારબાદ સોશિયલ મીડિયા પર માફી માગી હતી.

હિમાંશુ જાંગરા અને પ્રણિત મોરે

જાણીતા સ્ટેન્ડ-અપ કૉમેડિયન પ્રણિત મોરેના શોનો એક વીડિયો સોશિયલ મીડિયા પર જોરદાર વાયરલ થઈ રહ્યો છે અને હવે તેને લઈને વિવાદ પણ સર્જાયો છે. આ વીડિયોમાં પ્રણિત કલાકારો સાથે વાતચીત કરતો જોવા મળી રહ્યો છે. આ વાતચીત દરમિયાન, દર્શકોમાં બેઠેલા ગુરુગ્રામના રહેવાસી હિમાંશુ જાંગરાએ તેના જીવનનો એક ડેટ વિશેનો કિસ્સો શૅર કર્યો હતી, જેનાથી ઓનલાઈન વ્યાપક ટીકા થઈ અને હવે તેની સામે કાર્યવાહી કરવામાં આવી છે.

શો દરમિયાન શું કહેવામાં આવ્યું?

વાયરલ ક્લિપમાં, હિમાંશુ જાંગરાએ એક મહિલા સાથે ડેટ પર જવાનો ઉલ્લેખ કર્યો. તેણે ઉલ્લેખ કર્યો કે ડેટ દરમિયાન તેણે છોકરીને લગભગ 360–370 રૂપિયાની બિરયાની ખવડાવી હતી. જ્યારે આ છોકરીએ હિમાંશુને ઘરે મૂકવા આવવા કહ્યું, ત્યારે તેણે જવાબ આપ્યો કે “મેં બિરયાની પર 370 રૂપિયા ખર્ચ કર્યા હતા, તેથી હું આ રકમ ‘વસૂલ’ કરવા માગતો હતો.” વીડિયોમાં, હિમાંશુ કહેતો સાંભળાય છે કે, "મેં કહ્યું હતું કે રૂ. 370 ખર્ચ થયા હોવાથી, હું ચોક્કસપણે તે ખર્ચ વસૂલ કરીશ." અહેવાલો અનુસાર, તેણે બિરયાનીના બદલામાં છોકરી પાસેથી ‘જાતીય લાભ’ માગવાનો પણ સંકેત આપ્યો. આ ટિપ્પણીનો સોશિયલ મીડિયા પર તીવ્ર વિરોધ થયો.

કંપનીએ કાર્યવાહી કરી

હિમાંશુ જાંગરા હરિયાણાના ગુરુગ્રામ સ્થિત ડિઝાઇન ફર્મ સ્ટારવિક ડિઝાઇનમાં કામ કરતો હતો. વિવાદ વધ્યા બાદ, કંપનીના સ્થાપક, વિવેક વિશ્વકર્માએ સોશિયલ મીડિયા પર એક વીડિયો પોસ્ટ કરીને કંપનીનો અભિપ્રાય વ્યક્ત કર્યો. પોસ્ટના કૅપ્શનમાં, તેણે લખ્યું: "અમે હિમાંશુને કાઢી મૂક્યો છે. ભૂલોના પરિણામો હોય છે. પરંતુ અમે આશા રાખીએ છીએ કે તે પ્રતિબિંબ, શીખવા અને સકારાત્મક પરિવર્તનની તકો બનશે. પરિસ્થિતિની કાળજીપૂર્વક સમીક્ષા કર્યા પછી, અમે નિર્ણય લીધો છે અને તેનો ખુલ્લેઆમ ઉકેલ લાવવા માંગીએ છીએ. આ અમારો પ્રતિભાવ છે." કંપનીએ સ્પષ્ટતા કરી કે હિમાંશુને નોકરીમાંથી કાઢી મૂકવાનો નિર્ણય આ બાબતની સમીક્ષા કર્યા પછી લેવામાં આવ્યો હતો.

સોશિયલ મીડિયા પર માફી માગી એકાઉન્ટ બંધ કર્યું

વિવાદ બાદ, હિમાંશુ જાંગરાએ તેની ટિપ્પણી બદલ માફી માગી. તેણે તેનું સોશિયલ મીડિયા એકાઉન્ટ પણ બંધ કરી દીધું છે. સ્ટેન્ડઅપ કૉમેડિયન કલાકાર પ્રણિત મોરેને પણ આ ઘટના અંગે ટીકાનો સામનો કરવો પડ્યો હતો અને ત્યારબાદ સોશિયલ મીડિયા પર માફી માગી હતી. જોકે, વાયરલ વિડિઓ અંગે ચર્ચા સોશિયલ મીડિયા પર ચાલુ છે, જ્યાં લોકો શો દરમિયાન થયેલી વાતચીત અને તેના પરિણામો પર પોતાના મંતવ્યો વ્યક્ત કરી રહ્યા છે.