પગાર ઓછો હોવાથી વિરોધ કરવા મહિલા કર્મચારી આૅફિસમાં પાંચ કલાક સૂવા માંડી

ચીનમાં એક યુવતીએ જે રીતે ઓછા પગારનો વિરોધ કર્યો છે એનાથી સોશ્યલ મીડિયામાં ચર્ચા જાગી છે

પ્રતીકાત્મક તસવીર (તસવીર સૌજન્યઃ એઆઇ)

એપ્રિલ મહિનો શરૂ થઈ ગયો છે અને દરેક કર્મચારી આ વર્ષે ઇન્ક્રીમેન્ટ કેટલું મળશે એના પર મીટ માંડીને બેઠો હશે. તાજેતરમાં વધતી મોંઘવારી સામે ઓછાં પગારધોરણોનો વિરોધ પણ ઠેર-ઠેર થઈ રહ્યો છે. જોકે ચીનમાં એક યુવતીએ જે રીતે ઓછા પગારનો વિરોધ કર્યો છે એનાથી સોશ્યલ મીડિયામાં ચર્ચા જાગી છે. સૅલેરી ઓછી હોય તો વ્યક્તિ ઉપરી પાસે રજૂઆત કરે. જો એ રજૂઆત ન માનવામાં આવે તો નોકરી છોડી દે. ધારો કે નોકરીની બહુ જરૂર હોય તો ઓછા પગારે પણ ચૂપચાપ કામ કરતી રહે અને મોકો મળતાં જ નવી નોકરી પર જમ્પ મારે. જોકે ચીનની એક મહિલા કર્મચારીએ દાવો કર્યો હતો કે તે ઓછો પગાર હોવાથી ઑફિસમાં જઈને પાંચ કલાક સૂઈ જાય છે. તે પોતાની ડેસ્ક પર માથું મૂકીને કલાકો સુધી સૂઈ જાય છે. તેનું કહેવું છે કે જેટલા પૈસા મળશે એટલું જ કામ કરીશ. આ રવૈયા વિશે ઇન્ટરનેટ પર વિવાદ જાગ્યો છે.