આર્મી ઑફિસરે રૉયલ એન્ફીલ્ડથી ૧૯,૦૦૦ ફુટ ઊંચા ઉમલિંગ લાની સફર કરી

૭૭ વર્ષના રિટાયર્ડ આર્મી ઑફિસરે વિશ્વના હાઇએસ્ટ મોટરેબલ રોડ પર રૉયલ એન્ફીલ્ડથી ૧૯,૦૦૦ ફુટ ઊંચા ઉમલિંગ લાની સફર કરી

૧૦ દિવસમાં તેઓ લેહના ઉમલિંગ લા પાસ પહોંચ્યા હતા

જો હિંમત હોય તો કોઈ પણ સાહસ કરવા માટે ઉંમરના સીમાડાઓ નથી નડતા એ વાત સાકાર કરી છે ૭૭ વર્ષના રિટાયર્ડ લેફ્ટનન્ટ કર્નલ સોહન રૉયે. તેમણે પોતાની રૉયલ એન્ફીલ્ડ ક્લાસિક બાઇક પર ઉમલિંગ લા પાસની સફર કરી હતી. આ પાસ સુધી પહોંચવા માટેનો રસ્તો વિશ્વનો સૌથી ઊંચો મોટરેબલ રોડ છે. આ જગ્યા સમુદ્રથી ૧૯,૦૦૦ ફુટ જેટલી ઊંચી છે. 

સોહન રૉયે ૨૦ ઑગસ્ટે પુણેથી આ મોટરસાઇકલ યાત્રાની શરૂઆત કરી હતી. ૧૦ દિવસમાં તેઓ લેહના ઉમલિંગ લા પાસ પહોંચ્યા હતા. એ દરમ્યાન વચ્ચે ભરપૂર વરસાદ, ભૂસ્ખલન અને ખરાબ નેટવર્કને કારણે રસ્તો ભટકી જવા જેવી અનેક અડચણો આવી. એમ છતાં તેમણે અસંભવ લાગતા આ મિશનને સંભવ કરી બતાવ્યું હતું. તેઓ જમ્મુ, શ્રીનગર, દ્રાસ, કારગિલ, લેહ અને ન્યોમાના પહાડી વિસ્તારોમાંથી પસાર થયા હતા. તેઓ કારગિલ વૉર મેમોરિયલ પર શહીદોને શ્રદ્ધાંજલિ આપવા રોકાયા હતા.