તાઇવાનની એક રેસ્ટોરાંમાં ડરામણી ગૉડઝિલા સ્ટાઇલની વાનગીમાં મગરનો હાથ પીરસાય છે

અનોખી ડિશ માટે લાંબું વેઇટિંગ લિસ્ટ ઑલરેડી છે અને અત્યારે ઑગસ્ટ મહિનાના અંત સુધીનું બુકિંગ ઑલરેડી થઈ ચૂક્યું છે.

વાઇરલ વિડીયોમાંથી સ્ક્રીનશૉટ

ચીન અને તાઇવાનમાં જાતજાતનાં જાનવરો ખાવામાં આવે છે. તાજેતરમાં ઇન્ટરનેટ પર તાઇવાનની એક રેસ્ટોરાંએ બહાર પાડેલી ડિશ ચર્ચામાં આવી છે. એ વાનગીનું નામ છે ‘ગૉડઝિલા રામન’. સાઉથ તાઇવાનના ડુલિયુ નામની રેસ્ટોરાંમાં રામન નૂડલ્સની ઉપર મગરનો એક પગ રાંધીને સર્વ કરવામાં આવે છે. આ સૂપમાં જાતજાતનાં પંખીઓનાં ઈંડાં, બેબી કૉર્ન, બ્લૅક ફંગસ અને માછલીની પેસ્ટ જેવી ઘણી અળવીતરી ચીજો છે. એમાં સૌથી મહત્ત્વનો ભાગ છે મગરમચ્છનો હાથ. સાચકલા મગરનો કપાયેલો હાથ રાંધીને એમાં પીરસાય છે. પહેલાં એ હાથને સાફ કરીને એના પર આદું, લસણ અને પ્યાજની પેસ્ટ અને મસાલા લગાવીને મૅરિનેટ કરવામાં આવે છે. એ પછી એને બે કલાક સુધી ખાસ હર્બવાળા પાણીમાં પકાવવામાં આવે છે. આખી ડિશ રંધાઈને તૈયાર થતાં ૩ કલાક લાગે છે. એક ડિશની કિંમત લગભગ ૪૩૦૦ રૂપિયા છે. મગરમચ્છના પગ એમ આસાનથી મળી રહેતા ન હોવાથી રોજ આ રેસ્ટોરાં માત્ર બે જ ડિશ વેચે છે અને એ માટે પહેલેથી બુકિંગ કરાવી રાખવું પડશે. અનોખી ડિશ માટે લાંબું વેઇટિંગ લિસ્ટ ઑલરેડી છે અને અત્યારે ઑગસ્ટ મહિનાના અંત સુધીનું બુકિંગ ઑલરેડી થઈ ચૂક્યું છે.