૧૧ રાજ્યો અને કેન્દ્રશાસિત પ્રદેશોમાં પુરુષો કરતાં મહિલાઓ વધુ સેક્સ-પાર્ટનર્સ ધરાવે છે : સર્વે

પ્રતીકાત્મક તસવીર

નૅશનલ ફૅમિ​લી હેલ્થ સર્વે દ્વારા હાથ ધરાયેલા એક સર્વેક્ષણમાં જણાયું હતું કે ૧૧ રાજ્યો અને કેન્દ્રશાસિત પ્રદેશોમાં સરેરાશ મહિલાઓ પુરુષોની તુલનાએ વધુ સેક્સ-પાર્ટનર્સ ધરાવે છે. એકંદરે દેશમાં જીવનસાથી ન હોય અથવા જેમની સાથે પોતે રહેતા ન હોય તેવી વ્યક્તિ સાથે શારીરિક સંબંધ બાંધનારા પુરુષોની ટકાવારી ૪ ટકા હતી, જે મહિલાઓની તુલનાએ વધુ છે.

આ સર્વેમાં ૧.૧ લાખ મહિલાઓ અને ૧ લાખ પુરુષોને આવરી લેવામાં આવ્યાં હતાં, જે દર્શાવે છે કે ઘણાં રાજ્યો તથા કેન્દ્રશાસિત પ્રદેશોમાં સરેરાશ સેક્સ-પાર્ટનરની સંખ્યા પુરુષો કરતાં મહિલાઓ માટે વધારે છે.

આ રાજ્યો અને કેન્દ્રશાસિત પ્રદેશોમાં રાજસ્થાન, હરિયાણા, ચંડીગઢ, જમ્મુ-કાશ્મીર, લદાખ, મધ્ય પ્રદેશ, કેરલા, લક્ષદ્વીપ, પૉન્ડિચરી અને તામિલનાડુ છે. રાજસ્થાનમાં સેક્સ-પાર્ટનર ધરાવતા સરેરાશ ૧.૮ ટકા પુરુષો સામે મહિલાઓની સંખ્યા સૌથી વધુ સરેરાશ ૩.૧ ટકા હતી.

જોકે સર્વેક્ષણ પહેલાંના ૧૨ મહિનામાં એવા પુરુષોની ટકાવારી ૪ ટકા હતી, જેઓ તેમના જીવનસાથી કે લિવ-ઇન પાર્ટનર ન હોય તેવી વ્યક્તિ સાથે સમાગમ કર્યું હોય, જ્યારે મહિલાઓ માટે આ સંખ્યા ૦.૫ ટકા હતી.

૨૦૧૯-’૨૧ દરમ્યાન હાથ ધરવામાં આવેલા રાષ્ટ્રીય કુટુંબ આરોગ્ય સર્વેક્ષણ-પાંચમાં ૨૮ રાજ્યો અને આઠ કેન્દ્રશાસિત પ્રદેશોના ૭૦૭ જિલ્લાઓનો સર્વે કરવામાં આવ્યો હતો.  

રાષ્ટ્રીય અહેવાલ સામાજિક-આર્થિક અને અન્ય પૃષ્ઠભૂમિ લાક્ષણિકતાઓ દ્વારા ડેટા પણ પ્રદાન કરે છે, જે નીતિઘડતર અને અસરકારક કાર્યક્રમ અમલીકરણ માટે ઉપયોગી હોય છે.