29 April, 2025 02:42 PM IST | Uttarakhand | Gujarati Mid-day Correspondent
ગઈ કાલે ઉખીમઠથી બાબા કેદારનાથની પંચમુખી ડોલી નીકળી ત્યારે ભેગા થયેલા ભક્તો.
બાબા કેદારનાથની પંચમુખી ડોલી ગઈ કાલે શીતકાલીન ગાદીસ્થળ ઉખીમઠસ્થિત ઓમકારેશ્વર મંદિરથી વિધિવત્ પૂજા-અર્ચના બાદ કેદારનાથધામ તરફ જવા રવાના થઈ હતી. આ પ્રસંગે મોટી સંખ્યામાં ભાવિકો ઉપસ્થિત રહ્યા હતા. આ સમયે વાતાવરણ જય બાબા કેદાર અને કેદારનાથના જય-જયકારથી ગુંજી ઊઠ્યું હતું. આ પૌરાણિક પરંપરા સાથે જ કેદારનાથધામનાં કપાટ ખૂલવાની ઔપચારિક પ્રક્રિયાનો પણ આરંભ થઈ ચૂક્યો છે. આ ડોલી વિભિન્ન પડાવ પર રાત્રિ-વિશ્રામ કરીને પહેલી મેએ કેદારનાથ પહોંચશે. બાબા કેદારની ડોલી શિયાળાના છ મહિના ઉખીમઠમાં વિશ્રામ કરે છે અને પછી કપાટ ખૂલતાં પહેલાં ઉખીમઠથી કેદારનાથ જવા રવાના થાય છે. બીજી મેએ સવારે સાત વાગ્યે કેદારનાથધામનાં કપાટ ભક્તો માટે ખોલવામાં આવશે.
અખાત્રીજ પર બાળવિવાહ ન કરતા
અક્ષયતૃતીયા આવી રહી છે ત્યારે ગઈ કાલે રાજસ્થાનના બિકાનેરમાં સ્કૂલના વિદ્યાર્થીઓએ બાળવિવાહના વિરોધમાં અવેરનેસ ફેલાવી હતી. રાજસ્થાનમાં ઘણે ઠેકાણે અખાત્રીજના અતિશુભ મુરતમાં બાળવિવાહ યોજાતા હોય છે.