08 March, 2025 12:55 PM IST | Varanasi | Gujarati Mid-day Correspondent
કાશી વિશ્વનાથ મંદિર
આજે આંતરરાષ્ટ્રીય મહિલા દિન નિમિત્તે વારાણસીમાં આવેલા પવિત્ર કાશી વિશ્વનાથ મંદિરમાં નારીશક્તિના સન્માનમાં એક ખાસ પહેલ કરવામાં આવી છે અને મહિલા-ભાવિકોનાં દર્શન માટે ખાસ વ્યવસ્થા કરવામાં આવી છે. આજે આખો દિવસ મહિલાઓ VIP દર્શનનો આનંદ માણી શકશે. આ માટે ગેટ નંબર ચાર પર વ્યવસ્થા કરવામાં આવી છે. આ વ્યવસ્થા દ્વારા મહિલાઓ મંદિરની સામાન્ય ભીડથી બચીને મુશ્કેલી વિના ભગવાન શિવનાં દર્શન અને જળાભિષેક કરી શકશે. મહિલાઓએ આ પગલાની પ્રશંસા કરી હતી અને આ વિચારશીલ પગલા માટે વડા પ્રધાન નરેન્દ્ર મોદી અને ઉત્તર પ્રદેશના મુખ્ય પ્રધાન યોગી આદિત્યનાથનો ખાસ આભાર માન્યો હતો.
આ મુદ્દે કાશી વિશ્વનાથ મંદિરના ચીફ એક્ઝિક્યુટિવ ઑફિસર વિશ્વ ભૂષણ મિશ્રાએ કહ્યું હતું કે એક મીડિયા જૂથ દ્વારા મૂકવામાં આવેલા પ્રસ્તાવ બાદ આ વ્યવસ્થા કરવામાં આવી છે. તેમણે સૂચવ્યું હતું કે મહિલા દિને મહિલાઓ માટે દર્શનની ખાસ વ્યવસ્થા કરવામાં આવે. અમે આ પ્રસ્તાવ તરત જ સ્વીકારી લીધો અને કાશીના રહેવાસીઓ માટે આરક્ષિત ગેટ નંબર ૪ને અમે મહિલાઓ માટેના ગેટ તરીકે સમર્પિત કરવાનો નિર્ણય લીધો હતો.