રાજસ્થાનમાં ફરિયાદ માટે ટળવળી રહેલા વૃદ્ધ સામે પગ લાંબા કરીને બેસનાર મહિલા કૉન્સ્ટેબલ સસ્પેન્ડ

ડુંગરપુરના બિછીવાડા પોલીસ-સ્ટેશનનો ફોટો સોશ્યલ મીડિયા પર વાઇરલ થયા પછી મચ્યો ભારે હોબાળો, ગેરવર્તણૂક બદલ શિસ્તભંગનાં પગલાં શરૂ

સોશ્યલ મીડિયા પર આ ભયાનક આક્રોશ અને લોકોનો ગુસ્સો જોતાં જ રાજસ્થાન પોલીસ ઉચ્ચ સ્તરેથી તાત્કાલિક ઍક્શનમાં આવી હતી

રાજસ્થાન પોલીસના એક ભારે અસંવેદનશીલ ચહેરાને ઉજાગર કરતી ચોંકાવનારી ઘટના સામે આવી છે. ડુંગરપુર જિલ્લાના બિછીવાડા પોલીસ-સ્ટેશનમાં એક લાચાર વૃદ્ધ પોતાની ફરિયાદ નોંધાવવા માટે કલાકો સુધી આશાભરી નજરે રાહ જોઈને ઊભા રહ્યા હતા, જ્યારે ત્યાં ફરજ પર હાજર એક મહિલા કૉન્સ્ટેબલ ટેબલ પર બન્ને પગ લંબાવીને અત્યંત આરામથી બેઠેલી જોવા મળી હતી. ફરિયાદીની મુશ્કેલી ઉકેલવામાં સહેજ પણ રસ ન દાખવતી કૉન્સ્ટેબલના આ અહંકારી વલણનો પોલીસ-સ્ટેશનમાં જ હાજર કોઈ વ્યક્તિએ ફોટો પાડીને સોશ્યલ મીડિયા પર વાઇરલ કરી દીધો હતો. આ તસવીર સામે આવતાં જ ઇન્ટરનેટ પર લોકોનો ભારે આક્રોશ ફાટી નીકળ્યો હતો અને પોલીસતંત્રની આકરી ટીકા થઈ હતી.

સોશ્યલ મીડિયા પર આ ભયાનક આક્રોશ અને લોકોનો ગુસ્સો જોતાં જ રાજસ્થાન પોલીસ ઉચ્ચ સ્તરેથી તાત્કાલિક ઍક્શનમાં આવી હતી. ડુંગરપુર પોલીસે સત્તાવાર રીતે આ મામલાની ગંભીર નોંધ લેતાં એક પોસ્ટ દ્વારા સ્પષ્ટતા કરી છે કે ફરજ પ્રત્યે ઘોર બેદરકારી દાખવનાર અને વૃદ્ધ ફરિયાદી પ્રત્યે ભારે અનાદર દર્શાવનાર આ મહિલા કૉન્સ્ટેબલને તાત્કાલિક અસરથી સસ્પેન્ડ કરી દેવામાં આવી છે. આ સાથે જ તેની સામે ખાતાકીય શિસ્તભંગની કડક કાર્યવાહી પણ શરૂ કરવામાં આવી છે. 

આ ઘટનાએ ફરી એક વાર સાબિત કર્યું છે કે ડિજિટલ યુગમાં સોશ્યલ મીડિયા સામાન્ય જનતાનો અવાજ બનીને સરકારી તંત્રને ત્વરિત પગલાં લેવા મજબૂર કરી શકે છે.