હૈદરાબાદમાં એક વ્યક્તિએ ઑનલાઇન ફ્રૉડમાં ૨.૪૩ કરોડ ગુમાવ્યા, બાવીસ વર્ષનો યુવાન મુંબઈમાંથી ઝડપાયો

પ્રૉફિટ ઍપ્લિકેશનના વર્ચ્યુઅલ વૉલેટમાં જમા થતું હતું જે એકથી ત્રણ દિવસમાં પોતાના પર્સનલ બૅન્ક-અકાઉન્ટમાં ટ્રાન્સફર થઈ શકે એવી માહિતી તેમને આપવામાં આવી હતી

પ્રતીકાત્મક ફાઈલ તસવીર

ઇન્વેસ્ટમેન્ટના અનેકગણા રિટર્નની લોભામણી લાલચને કારણે હૈદરાબાદની એક વ્ય​ક્તિને ૨.૪૩ કરોડ રૂપિયાનો ચૂનો લાગ્યો છે. આ સ્કૅમમાં મહત્ત્વની ભૂમિકા ભજવી હતી નવી મુંબઈના બાવીસ વર્ષના યુવાને. રશ્મિત રાજેન્દ્ર પાટીલ નામના આ યુવકે ઑનલાઇન સ્કૅમ માટેનાં અકાઉન્ટ્સ પૂરાં પાડ્યાં હોવાનું હૈદરાબાદ સાઇબર ક્રાઇમ પોલીસે જણાવ્યું હતું.

કેસની વિગત મુજબ હૈદરાબાદમાં રહેતી ૫૬ વર્ષની એક વ્ય​ક્તિને સોશ્યલ મીડિયા પરથી ઇન્વેસ્ટમેન્ટ માટે SAMCO સિક્યૉરિટીઝ અને IIFL ઍપ્લિકેશનની લિન્ક મળી હતી જેમાં લૉગ-ઇન કર્યા બાદ શરૂઆતમાં તેમને ઇન્વેસ્ટમેન્ટ સામે ભરપૂર રિટર્ન મળવા લાગ્યું. આ પ્રૉફિટ ઍપ્લિકેશનના વર્ચ્યુઅલ વૉલેટમાં જમા થતું હતું જે એકથી ત્રણ દિવસમાં પોતાના પર્સનલ બૅન્ક-અકાઉન્ટમાં ટ્રાન્સફર થઈ શકે એવી માહિતી તેમને આપવામાં આવી હતી. આ માહિતી સાચી હોવાનું માની ફરિયાદી ઍપમાં લિસ્ટેડ જુદાં-જુદાં બૅન્ક-અકાઉન્ટ્સમાં રૂપિયા ટ્રાન્સફર કરતા રહ્યા. કુલ ૨.૪૩ કરોડ રૂપિયા ભરાઈ ગયા બાદ સ્કૅમર્સે તેમનું અકાઉન્ટ બ્લૉક કરી દીધું જેને કારણે તેઓ પોતાના રૂપિયા ઉપાડી પણ ન શકે.

તપાસ દરમ્યાન હૈદરાબાદ પોલીસને જણાયું હતું કે નકલી બૅન્ક-અકાઉન્ટ્સ પૂરાં પાડવાનું કામ રશ્મિતનું હતું. તેની ધરપકડ કરીને પોલીસે વધુ પૂછપરછ હાથ ધરી છે.