16 July, 2026 02:47 PM IST | Indore | Gujarati Mid-day Correspondent
વાઇરલ વિડીયોમાંથી સ્ક્રીનશૉટ
ભારતમાં બે મહિના પહેલાં રાંધણગૅસનાં સિલિન્ડરોની અછત હતી ત્યારે મધ્ય પ્રદેશમાં ઇન્દોરના વિકાસનગરના રહેવાસી રાજેન્દ્ર સાવલેને ઘણી વાર બુકિંગ કરાવ્યા પછી ગૅસ-સિલિન્ડર મળ્યું હતું, પણ એમાં લિક્વિફાઇડ પેટ્રોલિયમ ગૅસ (LPG)ને બદલે પાણી હતું. રાજેન્દ્રએ ગૅસ-એજન્સીને ફરિયાદ કરી ત્યારે એ સિલિન્ડર બદલવા માટે સંમત થઈ, પરંતુ ફરીથી ૯૭૦ રૂપિયાની માગણી કરી હતી. તેની પાસે ફરીથી આપવા માટે આટલા રૂપિયા નહોતા તેથી તેને બીજું સિલિન્ડર આપવામાં આવ્યું નહીં.
આ પછી બે મહિના સુધી તે પોતાની ફરિયાદ લઈને ઠેર-ઠેર ભટક્યો અને છેવટે કન્ઝ્યુમર કોર્ટમાં ગયો. જોકે તેની પાસે વકીલ રાખવા માટે પૈસા નહોતા એટલે તે ઘરે પાછો ફર્યો. જોકે ગયા મંગળવારે તે પાણીથી ભરેલા ગૅસ-સિલિન્ડર સાથે કલેક્ટરની ઑફિસમાં પહોંચ્યો હતો. તેણે જિલ્લા-પ્રશાસનની જાહેર સુનાવણીમાં બધાને બતાવ્યું કે સિલિન્ડરના નોઝલમાંથી LPG ગૅસને બદલે પાણી આવી રહ્યું છે. તેની ફરિયાદ બાદ ખાદ્ય વિભાગે ગૅસ-એજન્સીને સિલિન્ડર બદલી આપવાનો અને આ કેસની તપાસ કરવાનો નિર્દેશ આપ્યો હતો.
