મહારાષ્ટ્ર દિન નિમિત્તે રાજ્યની ભવ્ય સંસ્કૃતિ દર્શાવતી ખાઈ શકાય એવી કેક બનાવી પુણેની આ કેક-આર્ટિસ્ટે

આ પહેલાં પણ પ્રાચીએ અનેક ઐતિહાસિક સ્થાપત્યોની કેક બનાવી છે.

કેક-આર્ટિસ્ટ પ્રાચી ધાબલ દેબે મહારાષ્ટ્રની સમૃદ્ધ સંસ્કૃતિ અને વારસાને કેકમાં વણ્યો

ગઈ કાલે મહારાષ્ટ્ર રાજ્યનો સ્થાપનાદિન હતો એ નિમિત્તે પુણેની કેક-આર્ટિસ્ટ પ્રાચી ધાબલ દેબે મહારાષ્ટ્રની સમૃદ્ધ સંસ્કૃતિ અને વારસાને કેકમાં વણીને એક માસ્ટરપીસ તૈયાર કર્યો હતો. કેકને ભવ્ય અને રૉયલ લુક આપવા માટે વપરાયેલું આઇસિંગ વીગન હતું. આ કેકમાં ટ્રેડિશનલ મહારાષ્ટ્રિયન સ્ત્રીના શૃંગારનાં વિવિધ એલિમેન્ટ્સ રજૂ કરવામાં આવ્યાં હતાં. મહારાષ્ટ્રની પૈઠણી સાડી, વજ્રાતિક નેકપીસ, ચિંચપેટી, ઝૂમખા, બૅન્ગલ્સ, સિંદૂર-બૉક્સ અને નથ જેવી તમામ ચીજો કેક પર જાણે સાચી હોય એ રીતે ઉપસાવવામાં આવી હતી.

આ કેકમાં જે પૈઠણી સાડીની બૉર્ડર તૈયાર કરવામાં આવી છે એમાં વાઇબ્રન્ટ મોરની પ્રતિકૃતિઓ બનાવવા માટે ૨૫,૦૦૦ આઇસિંગ બિંદુઓનો ઉપયોગ કરવામાં આવ્યો છે. ચાર ફુટ ઊંચી આ કેકનું વજન ૫૦ કિલો જેટલું છે. કેકની ઉપર ન્યુ કોલ્હાપુર પૅલેસ અને મહારાષ્ટ્રના ઐતિહાસિક સ્થાપત્ય વારસાને પણ દર્શાવવામાં આવ્યો છે.

આ પહેલાં પણ પ્રાચીએ અનેક ઐતિહાસિક સ્થાપત્યોની કેક બનાવી છે. એમાં મિલાનના કથીડ્રલની ૧૦૦ કિલોની વીગન રૉયલ કેક અને ભારતીય આર્કિટેક્ચરલ પૅલેસ દર્શાવતી ૨૦૦ કિલોની કેકનો સમાવેશ થાય છે.