18 September, 2026 05:27 PM IST | Mumbai | Gujarati Mid-day Online Correspondent
`ધ ઓડિસી`ની ટીમે પણ ઑલિમ્પિયા કૉફી હાઉસની મુલાકાત લીધી હતી
મહારાષ્ટ્ર ફૂડ એન્ડ ડ્રગ એડમિનિસ્ટ્રેશને (FDA) દક્ષિણ મુંબઈના કોલાબામાં આવેલા 108 વર્ષ જૂના `ઑલિમ્પિયા કૉફી હાઉસ`નું ફૂડ લાયસન્સ સ્થગિત કરી દીધું છે. ગ્રાહકની ફરિયાદ બાદ આ કાર્યવાહી કરવામાં આવી હતી. 16 સપ્ટેમ્બરે કરવામાં આવેલી તપાસમાં ખાદ્ય સુરક્ષા અને સ્વચ્છતા અંગેની અનેક ખામીઓ જોવા મળી હતી.
FDAના જણાવ્યા અનુસાર, ઑલિમ્પિયા કૉફી હાઉસમાં ખાદ્ય સામગ્રી રાખી હતી ત્યાં જ ટૉયલેટ કરવાની જગ્યા પણ મળી આવી હતી. આ ઉપરાંત, ખોરાક તૈયાર કરવાના અને વાસણ ધોવાના વિસ્તારોમાં સ્વચ્છતાનો અભાવ જોવા મળ્યો હતો. ખોરાક સીધો જ જમીન પર મૂકવામાં આવતો હતો અને સ્વચ્છ પાણીનો યોગ્ય રીતે ઉપયોગ થતો ન હતો. તપાસ દરમિયાન કૉકરોચ અને માખીઓ પણ મળી હતી. રઍફ્રિજરેટરની અંદર માંસ અને લોહીના અંશો મળી આવ્યા હતા. કાચા શાકાહારી અને માંસાહારી ખોરાકને અલગ-અલગ રાખવામાં આવ્યા ન હતા. લાકડાના બગડી ગયેલા કટિંગ બોર્ડ અને ખોરાક સંભાળતા કર્મચારીઓ માટે યોગ્ય સુરક્ષાત્મક કપડાંનો અભાવ પણ નોંધવામાં આવ્યો હતો. જ્યાં સુધી આ ખામીઓ સુધારવામાં ન આવે અને સંતોષકારક પુનઃ-તપાસ ન થાય ત્યાં સુધી FDAએ આ કૅફેને ખોરાક ખરીદવા, તૈયાર કરવા, સંગ્રહિત કરવા, વેચવા કે વિતરિત કરવા પર પ્રતિબંધ મૂક્યો છે.
FDAના કમિશનર તુકારામ મુંઢેના નેતૃત્વમાં 16 સપ્ટેમ્બરે મુંબઈમાં ખાણીપીણીની તપાસ કરવામાં આવી હતી. આ ઝુંબેશ દરમિયાન સાત સંસ્થાઓના લાયસન્સ સ્થગિત કરવામાં આવ્યા હતા. આમાં નાયર હૉસ્પિટલનો નર્સિંગ વિભાગનો મૅસ, ચેમ્બુરમાં પેસ્ટોમ સાગર રોડ પરનું બ્લિંકિટ (Blinkit) સૅન્ટર, ઘાટકોપરમાં વિશ્વાસ સ્વીટ્સ એન્ડ સ્નૅક્સ અને A-1 જનરલ એન્ડ ડ્રાય ફ્રૂટ્સ, વરલીમાં મિલન પંજાબ અને મલાડ પૂર્વમાં સદગુરુ સ્વીટ્સનો સમાવેશ થાય છે. મિલન પંજાબમાં રૅફ્રિજરેટરની અંદર માંસ અને લોહીના અંશો મળી આવ્યા હતા અને કાચા શાકાહારી તથા માંસાહારી ખોરાકને અલગ રાખવામાં આવ્યા ન હતા. બ્લિંકિટ સૅન્ટરમાં પણ ખાદ્ય સુરક્ષા અને સ્વચ્છતાના નિયમોનું ગંભીર ઉલ્લંઘન જોવા મળ્યું હતું.
નાયર હૉસ્પિટલના ડીન ડૉ. શૈલેષ મોહિતેએ કહ્યું, "સૌ પ્રથમ તો, આ અમારી મુખ્ય કૅન્ટીન નથી. જે લાયસન્સ સ્થગિત કરવામાં આવ્યું છે તે અમારા નર્સિંગ વિભાગના મૅસનું છે, જે ખાનગી કૉન્ટ્રાક્ટર દ્વારા ચલાવવામાં આવે છે. તપાસ 16 સપ્ટેમ્બરે થઈ હતી; જોકે, વાસ્તવમાં તપાસ 12 સપ્ટેમ્બરે થઈ હતી." તેમણે ઉમેર્યું, "તપાસ કરવા માટે માત્ર એક જ વ્યક્તિ આવી હતી. તેમણે મૅસના કૉન્ટ્રાક્ટર કે હૉસ્પિટલના કોઈ અધિકારીને જાણ કરી ન હતી, તેમજ પોતાની ઓળખ પણ દર્શાવી ન હતી. તેમણે કોઈ સાક્ષીઓની સહી લીધા વિના જ અહેવાલ તૈયાર કર્યો. તપાસની પ્રક્રિયામાં જ ખામીઓ રહેલી છે. અમે આ અંગે કૉન્ટ્રાક્ટર સાથે ચર્ચા કરી છે અને હવે આગળની જરૂરી કાર્યવાહી કરવામાં આવશે."
ઑલિમ્પિયા કૉફી હાઉસ જુલાઈ મહિનામાં અન્ય એક કારણસર પણ ચર્ચામાં આવ્યું હતું. ફિલ્મ ડિરેક્ટર ક્રિસ્ટોફર નોલને હૉલિવુડના અભિનેતાઓ મૅટ ડેમન અને ટૉમ હૉલેન્ડ સાથે મળીને, ભારતમાં તેની ફિલ્મ ‘ધ ઑડિસી’ (The Odyssey) રિલીઝ થાય તે પહેલાં આ સ્થળની મુલાકાત લીધી હતી. આ કાફે તેના કીમા-પાવ, ભુરજી-પાવ, બિરયાની, ચા અને બન-મસ્કા માટે જાણીતું છે.
