05 February, 2026 07:39 AM IST | Mumbai | Gujarati Mid-day Correspondent
પ્રતીકાત્મક તસવીર
મુંબઈમાં સંબંધોને શર્મસાર કરતી એક ચોંકાવનારી ઘટના સામે આવી છે. લોઅર પરેલમાં રહેતી ૪૫ વર્ષની મહિલા લેખિકાએ પોતાના જ પતિ વિરુદ્ધ તેમની ૮ વર્ષની દીકરીની જાતીય સતામણી કરવાનો આરોપ મૂકીને મંગળવારે એન. એમ. જોશી માર્ગ પોલીસમાં ફરિયાદ નોંધાવી હતી. પોલીસે પિતા સામે જ પ્રોટેક્શન ઑફ ચિલ્ડ્રન ફ્રૉમ સેક્સ્યુઅલ ઑફેન્સિસ (POCSO) ઍક્ટ હેઠળ ગુનો નોંધીને વધુ તપાસ શરૂ કરી છે. આરોપી પિતા છેલ્લાં ૪ વર્ષથી દીકરીનું શોષણ કરી રહ્યો હોવાનો આરોપ ફરિયાદમાં કરવામાં આવ્યો છે.
એન. એમ. જોશી માર્ગ પોલીસ-સ્ટેશનના એક સિનિયર અધિકારીએ કહ્યું હતું કે ‘આરોપી પિતા દીકરીને ભણાવવાના બહાને તેની પાસે બેસતો હતો અને તેને અશ્લીલ વિડિયો-ક્લિપ્સ જોવા માટે મજબૂર કરતો હતો. આરોપી પર સગીર બાળકીને વારંવાર અયોગ્ય રીતે સ્પર્શ કરવાનો અને અશ્લીલ માગણીઓ કરવાનો આરોપ પણ માતાએ ફરિયાદમાં કર્યો છે. આ મામલો ત્યારે પ્રકાશમાં આવ્યો જ્યારે માસૂમ બાળકીએ હિંમત એકઠી કરીને મમ્મીને પોતાની સાથે થતી આપવીતી વર્ણવી હતી. દીકરીની વાત સાંભળીને સ્તબ્ધ થઈ ગયેલી લેખિકાએ તરત જ દીકરીની સુરક્ષાને પ્રાધાન્ય આપ્યું હતું. તેણે દીકરી સાથે એ ઘર છોડી દીધું હતું અને સુરક્ષિત સ્થળે સ્થળાંતર કર્યું હતું. ત્યાર બાદ તેણે અમારો સંપર્ક કરીને ફરિયાદ નોંધાવી હતી. છેલ્લાં ૪ વર્ષથી ચાલી રહેલી આ ઘટનાની ઝીણવટભરી તપાસ કરવામાં આવી રહી છે.’
