08 September, 2026 07:38 AM IST | Mumbai | Gujarati Mid-day Correspondent
પ્રતીકાત્મક તસવીર
મુંબઈ સેન્ટ્રલ ડેપોની ભાયખલા સ્ટેશનથી વરલી જઈ રહેલી બૃહન્મુંબઈ ઇલેક્ટ્રિક સપ્લાય ઍન્ડ ટ્રાન્સપોર્ટ (BEST) અન્ડરટેકિંગની બસની એડફેટે આવતાં ૬૦ વર્ષની એક મહિલાનું મૃત્યુ થયું હતું. અકસ્માતની આ ઘટના ગઈ કાલે સવારે ૧૧.૨૫ વાગ્યે વરલીમાં બની હતી.
BESTના જણાવ્યા અનુસાર બસ વરલી પર સેલ્સ-ટૅક્સ ઑફિસ પાસેનું સિગ્નલ રેડ હોવાથી ઊભી હતી. એ વખતે બસની બાજુમાં ઊભેલી ટૅક્સીમાંથી ૬૦ વર્ષનાં વનમાલા સાબળે રેડ સિગ્નલ જોઈને ઊતર્યાં હતાં. બરાબર એ જ વખતે સિગ્નલ ગ્રીન થતાં બસ-ડ્રાઇવરે બસ આગળ લીધી હતી. વનમાળા સાબળે એ વખતે બસના લેફ્ટ સાઇડના પાછળના ટાયર હેઠળ આવી જતાં તેમને માથામાં ગંભીર ઈજા થઈ હતી અને તેમના માથામાંથી અને કાનમાંથી લોહી નીકળી રહ્યું હતું. બસનો કન્ડક્ટર તેમને તરત જ નાયર હૉસ્પિટલમાં લઈ ગયો હતો. જોકે હૉસ્પિટલના ડૉક્ટરે તેમને તપાસીને મૃત જાહેર કર્યાં હતાં.
પોલીસે ડ્રાઇવર વિરુદ્ધ કેસ નોંધીને તપાસ શરૂ કરી છે, જ્યારે ટ્રાન્સપોર્ટ ડિપાર્ટમેન્ટે ઘટનાની નોંધ લઈને ડિપાર્ટમેન્ટલ ઇન્ક્વાયરી શરૂ કરી છે.
