27 September, 2026 05:23 PM IST | Mumbai | Gujarati Mid-day Online Correspondent
પ્રતીકાત્મક ફાઇલ તસવીર
મુંબઈ લોકલ ટ્રેનના મહિલા ડબ્બામાં મરાઠી ભાષાને લઈને બે મહિલાઓ વચ્ચે થયેલા ઝઘડાનો એક વીડિયો સોશિયલ મીડિયા પર વાયરલ થઈ રહ્યો છે. આ વીડિયોમાં બન્ને મહિલાઓ વચ્ચે જોરદાર દલીલ થતી જોવા મળી રહી છે. વિવાદનું મૂળ કારણ ભાષાને લગતો વિવાદ હોવાનું કહેવાય છે.
સોશિયલ મીડિયા પ્લેટફોર્મ `X` પર શૅર કરાયેલા આ વીડિયોમાં, એક મરાઠીભાષી મહિલા અને ઉત્તર પ્રદેશની હોવાનું જણાતી અન્ય એક મહિલા વચ્ચે ઉગ્ર બોલાચાલી થઈ રહી છે. આ વિવાદ ટ્રેનમાં મુસાફરી કરતી વખતે કઈ ભાષા બોલવી જોઈએ તે મુદ્દે છે. વીડિયોમાં એક મહિલા બીજી મહિલાને કહેતી સંભળાય છે, "જો તમે મરાઠી બોલી શકતા નથી, તો યુપી (UP) પાછા જતા રહો. અહીં ફક્ત અમારી ભાષા જ બોલાશે." જવાબમાં, બીજી મહિલા વળતો જવાબ આપે છે, "અમે શા માટે જઈએ? તમે યુપી જતા રહો." ત્યારબાદ બન્ને મહિલાઓ વચ્ચેની દલીલ વધુ ઉગ્ર બને છે. વીડિયોમાં તેઓ એકબીજા વિરુદ્ધ અપશબ્દોનો પ્રયોગ કરતી પણ સંભળાય છે.
વીડિયો સામે આવ્યા બાદ સોશિયલ મીડિયા પર આ ઘટના અંગે મિશ્ર પ્રતિક્રિયાઓ જોવા મળી હતી. એક યુઝરે ટિપ્પણી કરી, "મુંબઈ ક્યારેય મહારાષ્ટ્રનો ભાગ નહોતું; તે બૉમ્બે પ્રેસિડેન્સીનો ભાગ હતું, જે ગુજરાતનો હિસ્સો હતું. લોહિયાળ રમખાણો બાદ ગુજરાતે તેને જતું કર્યું હતું. હુતાત્મા ચોક તે રમખાણોનો સાક્ષી છે. બૉમ્બેમાં કોઈને પણ અન્ય વ્યક્તિને કઈ ભાષા બોલવી તે કહેવાનો અધિકાર નથી. હું તેને મુંબઈ નહીં, પણ બૉમ્બે જ કહીશ." અન્ય એક યુઝરે લખ્યું, "આપણે મરાઠી ક્યાં બોલવી જોઈએ? શું આપણે ભારતની ત્રીજી સૌથી વધુ બોલાતી ભાષાને લુપ્ત થવા દઈને માત્ર હિન્દી સ્વીકારવી જોઈએ? મરાઠી સાથે શું સમસ્યા છે? શું તમે સાંભળ્યું કે તે હિન્દીભાષી મહિલાએ મરાઠી વિશે શું કહ્યું?"
વાયરલ વીડિયોમાં ટ્રેનના અન્ય મુસાફરો પણ આ બે મહિલાઓ વચ્ચેની તકરાર જોતા જોવા મળે છે. કેટલીક મહિલાઓ એક મહિલાની તરફેણમાં ઊભેલી અને બીજી મહિલા સાથે દલીલ કરતી પણ દેખાય છે. જોકે, આ ઘટના મુંબઈ લોકલના કયા સ્ટેશન નજીક બની તે સ્પષ્ટ નથી. બન્ને મહિલાઓ વચ્ચે વિવાદ શા માટે શરૂ થયો તે અંગેની સંપૂર્ણ વિગતો હજી સુધી જાણવા મળી નથી. આ ઘટના અંગે સત્તાવાર વિગતોની રાહ જોવાઈ રહી છે.
મુંબઈની લોકલ ટ્રેનના નિયમિત પ્રવાસીઓને જો કોઈ પૂછે કે તમને સૌથી વધુ વિશ્વાસ કોના પર છે? તો તે કદાચ થોડું વિચારીને કહેશે કે મારી મુંબઈ લોકલ પર. હા, એ જ મુંબઈ લોકલ જે ક્યારેક સમયસર આવે છે, ક્યારેક મોડેથી આવે છે, ક્યારેક ઝડપથી ચાલે છે અને ક્યારેક રસ્તામાં એવી રીતે ઊભી રહે છે કે જાણે લગાતાર દોડી-દોડીને હાંફી ગઈ હોય. છતાં મુંબઈકર રોજ એની રાહ જુએ છે; કારણ કે મુંબઈ લોકલ માત્ર એક ટ્રેન નથી, એ મુંબઈની લાઇફલાઇન છે. લાખો મુંબઈકરોના ઘરનો ચૂલો છે. કોઈની ઑફિસ, કોઈની દુકાન, કોઈનો વ્યવસાય તો કોઈનું શિક્ષણ છે અને જેનાં પૈડાં સાથે આખું મુંબઈ ચાલે છે. મુંબઈકર અને મુંબઈ લોકલનો સંબંધ માત્ર મુસાફર અને વાહનનો નથી. આ તો એવો આત્મીય અને અલૌકિક સંબંધ છે જેને કોઈ એક નામ આપીને સીમિત કરી શકાય નહીં.
