12 July, 2026 01:06 PM IST | Mumbai | Gujarati Mid-day Online Correspondent
તાજ હોટેલ (સૌજન્ય મિડડે)
Mumbai Bomb Threat મુંબઈની જાણીતી તાજ હોટલમાં બોમ્બ મૂકવામાં આવ્યો હોવાની ધમકી મળ્યા બાદ સુરક્ષા એજન્સીઓ સતર્ક થઈ ગઈ હતી. રવિવારે વહેલી સવારે મુંબઈ પોલીસને એક ફોન કોલ આવ્યો હતો, જેમાં ફોન કરનારે દાવો કર્યો હતો કે અંડરવર્લ્ડ ડોન દાઉદ ઇબ્રાહિમે તાજ હોટલમાં બોમ્બ મૂક્યો છે. માહિતી મળતા જ મુંબઈ પોલીસ એક્શનમાં આવી ગઈ હતી અને કોલાબા સ્થિત તાજ હોટલમાં તપાસ માટે અલગ-અલગ ટીમો મોકલવામાં આવી હતી. આ તપાસમાં કોલાબા પોલીસ, ક્રાઇમ બ્રાન્ચ અને બોમ્બ સ્ક્વોડની ટીમ પણ સામેલ હતી. પોલીસ અને સુરક્ષા ટીમોએ હોટલના દરેક ભાગમાં ઝીણવટભરી તપાસ કરી હતી, પરંતુ કોઈ વિસ્ફોટક વસ્તુ કે શંકાસ્પદ બાબત મળી નહોતી. ત્યારબાદ પોલીસે આ Mumbai Bomb Threat ફોન કોલને ખોટી ધમકી (હોક્સ કોલ) જાહેર કર્યો હતો. પોલીસના જણાવ્યા અનુસાર, ફોન કરનાર નંબરની ઓળખ થઈ ગઈ છે અને આરોપીને પકડવા માટે કાર્યવાહી શરૂ કરવામાં આવી છે.
મળતી માહિતી મુજબ, રાત્રે લગભગ 12:13 વાગ્યે નવી મુંબઈ પોલીસ કંટ્રોલ રૂમમાં આ ફોન આવ્યો હતો. ફોન કરનારે તાજ હોટલમાં બોમ્બ હોવાની વાત કહી હતી. આ માહિતી મળ્યા બાદ તરત જ મુંબઈ પોલીસે તાજ હોટલ તરફ ટીમો રવાના કરી હતી. Mumbai Bomb Threat તપાસ બાદ જાણવા મળ્યું કે આ ફોન નવી મુંબઈના તુર્ભે વિસ્તારથી કરવામાં આવ્યો હતો. હાલ પોલીસ આરોપીની શોધ કરી રહી છે અને સમગ્ર મામલે વધુ તપાસ ચાલી રહી છે.
મુંબઈની તાજ હોટલ દેશની સૌથી જાણીતી હોટલોમાંથી એક છે. તેની સુરક્ષા હંમેશા કડક રાખવામાં આવે છે. આ પહેલી વાર નથી કે તાજ હોટલને આવી ધમકી મળી હોય. અગાઉ પણ અલગ-અલગ સમયે બોમ્બ ધમકી અને હુમલાની ચેતવણીઓ મળી ચૂકી છે. ખાસ કરીને 26/11ના મુંબઈ આતંકી હુમલા દરમિયાન તાજ હોટલને આતંકવાદીઓએ નિશાન બનાવી હતી. આ હુમલામાં અનેક લોકોના જીવ ગયા હતા અને હોટલને પણ ભારે નુકસાન થયું હતું. આ ઘટના બાદ તાજ હોટલની સુરક્ષા વધુ મજબૂત કરવામાં આવી હતી. આજે પણ તે મુંબઈના સૌથી સુરક્ષિત સ્થળોમાંનું એક માનવામાં આવે છે.
તાજ હોટલ જેવી મહત્વની જગ્યા પર કોઈપણ ધમકી મળે ત્યારે પોલીસ તેને ગંભીરતાથી લે છે. ભલે તપાસમાં ઘણી વખત આવી ધમકીઓ ખોટી સાબિત થાય, પરંતુ સુરક્ષા એજન્સીઓ કોઈ જોખમ ન રહે તે માટે સંપૂર્ણ તપાસ કરે છે. હાલ તાજ હોટલમાં સ્થિતિ સામાન્ય છે અને પોલીસ ફોન કરનાર વ્યક્તિ સુધી પહોંચવાનો પ્રયાસ કરી રહી છે.
