તમારી ગાડી રોકીને પેન્ડિંગ ટ્રાફિક-ફાઇન જબરદસ્તી નહીં ઉઘરાવી શકે પોલીસ

વાહન જપ્ત કરવાની ધમકી આપે તો પણ ગભરાવા જેવું નથી, એ કોર્ટના આદેશ દ્વારા જ થઈ શકે છે

ફાઇલ તસવીર

રસ્તા પર જ વાહનચાલકોને રોકીને તેમની પાસેથી પહેલાંના ઈ-ચલાનના ફાઇન વસૂલવા ટ્રાફિક ડિપાર્ટમેન્ટના કર્મચારીઓ દ્વારા કરાતા દબાણ અને જો એ ફાઇન ન ભર્યો તો દસ્તાવેજો કે પછી વાહન જપ્ત કરવાની અપાતી ધમકીઓને પગલે ટ્રાન્સપોર્ટ અસોસિએશને કરેલી રજૂઆતને લીધે ઍડિશનલ ડિરેક્ટર જનરલ ઑફ પોલીસ (સ્ટેટ ટ્રાફિક) પ્રવીણ સાળુંખેએ મહારાષ્ટ્રના તમામ ટ્રાફિક-યુનિટ્સને એક સર્ક્યુલર ઇશ્યુ કરીને નિર્દેશ આપ્યો છે કે તેઓ રસ્તાઓ પર બાકી રહેલા ઈ-ચલાન ચૂકવવા માટે મોટરિસ્ટોને દબાણ ન કરે અથવા ગેરકાયદે ચુકવણી માટે તેમને ધમકાવે નહીં. સર્ક્યુલર મુજબ બાકી દંડ મોટરચાલક દ્વારા સ્વેચ્છાએ ચૂકવવામાં આવે તો જ સ્વીકારવામાં આવશે. એમાં એમ પણ કહેવામાં આવ્યું છે કે વાહનો કોર્ટના આદેશથી જ જપ્ત કરી શકાય છે.
સર્ક્યુલરમાં કહેવામાં આવ્યું છે કે બાકી દંડ વસૂલવા અને વાહનો જપ્ત કરવા માટે એક સ્ટૅન્ડર્ડ ઑપરેટિંગ પ્રોસીજર ઇશ્યુ કરવામાં આવી છે અને તમામ ટ્રાફિક-યુનિટોએ એનું પાલન કરવું જોઈએ. ટ્રાફિક પોલીસ કર્મચારીઓને વાહનચાલકો સાથે નમ્ર વર્તન કરવાની સૂચના આપવામાં આવી હતી.

સ્કૂલ-બસોને રાહત

એક અલગ સર્ક્યુલરમાં ટ્રાફિક વિભાગે તમામ એકમોને સૂચના આપી છે કે જ્યાંથી અધિકૃત સ્કૂલ-બસો બાળકોને ઉપાડે છે અથવા છોડે છે ત્યાં તેમને નો-પાર્કિંગ ચલાન ફટકારવામાં ન આવે. જોકે તેમણે કહ્યું હતું કે શાળાનાં બાળકોને લઈ જતાં અનધિકૃત વાહનો સામે કડક કાર્યવાહી કરવામાં આવશે.

નૅશનલ પરમિટની પૅસેન્જર-બસને પણ રાહત

સર્ક્યુલરમાં ટ્રાફિક-યુનિટ્સને એ પણ સૂચના આપવામાં આવી હતી કે નૅશનલ પરમિટ ધરાવતી પૅસેન્જર-બસોને મુસાફરો બસમાં ચડે કે ઊતરે એ સમય માટે નો-પાર્કિંગ ચલાન જારી ન કરવાં જોઈએ.