ટ્રાફિકનું ઈ-ચલાન ભરવાનું બાકી હશે તો હવે AI યાદ કરાવશે

ઇન્શ્યૉરન્સ, ફિટનેસ સર્ટિફિકેટ અને PUCની ડેડલાઇન પણ ઑટોમેટેડ કૉલ યાદ કરાવશે

પ્રતીકાત્મક ફાઇલ તસવીર

હવે ટ્રાફિકના નિયમોના ઉલ્લંઘન માટે મળેલું ઈ-ચલાન ભરવાનું ચૂકી જશો તો આર્ટિફિશ્યલ ઇન્ટેલિજન્સ (AI) તમને યાદ અપાવશે. આ નવી યોજના હેઠળ ડ્રાઇવરોને રીજનલ ટ્રાન્સપોર્ટ ઑફિસ (RTO) દ્વારા ઑટોમેટેડ ફોન-કૉલ કરવામાં આવશે.

સરકારી આંકડાઓ મુજબ ૨૦૧૯માં વન સ્ટેટ, વન ઈ-ચલાન યોજના લાગુ થયા બાદ અત્યાર સુધીમાં ૧૧.૪ કરોડ ઈ-ચલાન ઇશ્યુ કરવામાં આવ્યાં છે, જેની કુલ રકમ ૭૨૭૨ કરોડ રૂપિયા જેટલી છે. એમાંથી અત્યાર સુધીમાં માત્ર ૨૬૩૫ કરોડના મૂલ્યનાં પાંચ કરોડ ઈ-ચલાન જ ભરાયાં છે. હાલમાં દંડની વસૂલાતનો દર ઘણો ઓછો છે અને અંદાજિત ૬૦ ટકા જેટલા કિસ્સામાં ડ્રાઇવરો દંડ ભરતા નથી. આ ગંભીર સમસ્યાના કાયમી ઉકેલ માટે રાજ્ય સરકારે ૧૧.૮૦ કરોડ રૂપિયાના ખર્ચે AI-બેઝ્ડ કૉલિંગ પ્રોજેક્ટને મંજૂરી આપી છે.

જો વાહનચાલક દ્વારા નિયત સમયમાં દંડ ભરવામાં નહીં આવે તો સિસ્ટમ દ્વારા ફરી ફૉલો-અપ કૉલ્સ પણ કરવામાં આવશે.

આ પ્રોજેક્ટની શરૂઆત મુંબઈની તાડદેવ, અંધેરી, વડાલા અને બોરીવલી RTOથી કરવામાં આવશે અને તબક્કાવાર એને સમગ્ર રાજ્યમાં લાગુ કરવામાં આવશે. આ સિસ્ટમ માત્ર દંડની વસૂલાત પૂરતી મર્યાદિત નહીં રહે; પરંતુ વ્હીકલનો ઇન્શ્યૉરન્સ, ફિટનેસ સર્ટિફિકેટ અને પૉલ્યુશન અન્ડર કન્ટ્રોલ (PUC) જેવા મહત્ત્વના ડૉક્યુમેન્ટ્સની સમયમર્યાદા પૂરી થવા વિશે પણ અગાઉથી જાણ કરવામાં આવશે.