16 April, 2026 08:36 AM IST | Mumbai | Gujarati Mid-day Correspondent
વાઇરલ વિડીયોમાંથી સ્ક્રીનશૉટ
ગોરેગાવસ્થિત નેસ્કો સેન્ટરમાં યોજાયેલી કૉન્સર્ટ દરમ્યાન ડ્રગ્સના ઓવરડોઝથી MBAના બે સ્ટુડન્ટ્સનાં મોત પછી આ મામલે વનરાઈ પોલીસે ગઈ કાલ સુધીમાં ૧૬ લોકોનાં સ્ટેટમેન્ટ્સ નોંધીને વધુ તપાસ હાથ ધરી છે. પચીસ વર્ષની જે યુવતીની હાલત ગંભીર હતી તેને હવે હૉસ્પિટલના જનરલ વૉર્ડમાં શિફ્ટ કરવામાં આવી છે. બીજી તરફ પાર્ટીમાં ડ્રગ્સ પહોંચાડનાર આરોપી પાસેથી વધુ માહિતી લેવા માટે પણ તપાસ કરવામાં આવી છે. પ્રાથમિક માહિતીના આધારે મુખ્ય આરોપીઓએ પાર્ટીમાં ડ્રગ્સ ઍપ-બેઝ્ડ કુરિયર મારફત મોકલ્યું હોવાનો ખુલાસો થયો છે.
વનરાઈ પોલીસ-સ્ટેશનના એક સિનિયર અધિકારીએ ‘મિડ-ડે’ને કહ્યું હતું કે ‘આ ઘટનાની તપાસમાં ૧૬ લોકોનાં સ્ટેટમેન્ટ્સ નોંધવામાં આવ્યાં છે. પાર્ટીમાં હાજર અન્ય યુવક-યુવતીનાં નિવેદનો પણ લેવામાં આવી રહ્યાં છે. કૉન્સર્ટ પૂરી થયા બાદ પાર્કિંગ વિસ્તારમાં નશાની હાલતમાં યુવાનો દ્વારા ગાડીઓ પર ચડી હંગામો કરવાના વિડિયો પણ વાઇરલ થયા હતા એની પણ તપાસ કરવામાં આવી રહી છે. તપાસમાં બે ચોંકાવનારા મુદ્દા સામે આવ્યા છે. કાર્યક્રમ માટે એક્સાઇઝ વિભાગ તરફથી સંપૂર્ણ મંજૂરી આપવામાં આવી હતી અને રાત્રે દોઢ વાગ્યા સુધી દારૂ પીરસવાની પણ મંજૂરી હતી. દરમ્યાન કાર્યક્રમમાં બિન્દાસ રીતે દારૂ સાથે મોટા પાયે ડ્રગ્સનું સેવન થયું હોવાની માહિતી મળી છે. બીજી તરફ અનેક જાણીતા ઇન્ફ્લુએન્સર પણ પાર્ટીમાં હાજર હોવાની માહિતી સામે આવી છે. પાર્ટીમાં હાજર તમામ લોકોની ટેસ્ટ કરવી શક્ય ન હોવાથી મૃત્યુ પામેલા લોકો સાથે સંકળાયેલા લોકોની ટેસ્ટ માટેની પ્રક્રિયા હાથ ધરવામાં આવી છે.’
આગળ કઈ દિશામાં તપાસ થશે?
વનરાઈ પોલીસ-સ્ટેશનના એક સિનિયર અધિકારીએ કહ્યું હતું કે ‘મુખ્ય આરોપી સહિત આ કાંડમાં સંકળાયેલા બીજા આરોપીના કૉલડેટા ભેગા કરવામાં આવી રહ્યા છે તેમ જ ઘટના સમયે શું બન્યું, કેવી રીતે બન્યું એની વિગતવાર માહિતી જાણવા માટે CCTV કૅમેરાનાં ફુટેજ તપાસવામાં આવશે. એટલું જ નહીં, જ્યારે ઘટના બની ત્યારે સેન્ટરની હૉસ્પિટલ સુધી પહોંચવા માટે ઍમ્બ્યુલન્સ હાજર હતી કે કેમ એની પણ તપાસ કરવામાં આવશે. આરોપી સુધી ડ્રગ્સ કોણે અને કેવી રીતે પહોંચાડ્યું, કેટલા પૈસા લેવામાં આવ્યા એની માહિતી ભેગી કરવામાં આવી રહી છે.’
